Кенг кўламли геосиёсий инқироз туфайли бутун автомобиль бозори зарар кўрмоқда. Европа компаниялари эҳтиёт қисмлар етишмаслиги туфайли ишлаб чиқаришни тўхтатаётган бир пайтда, «АвтоВАЗ» шунчаки бир қатор эҳтиёт қисмлардан воз кечишга қарор қилди.
Россия Федерациясининг Украинадаги махсус операцияси атрофидаги вазият жаҳон автомобиль бозоридаги инқирозни кучайтиришда давом этмоқда. Европа ва Америка брендлари мамлакатда ишлаб чиқарилган эҳтиёт қисмларни етказиб бериш билан боғлиқ муаммолар туфайли ишлаб чиқаришни тўхтатмоқда. Пандемиядан бери давом этаётган яримўтказгичлар тақчиллиги ҳам тўхтагани йўқ.
Етказиб бериш занжирларининг узилиши ва Россия Федерациясидаги йирик Европа ва Америка компаниялари ишининг тўхтатилиши фонида «АвтоВАЗ» ўта оғир вазиятдан чиқиш йўлини топишга ҳаракат қилмоқда. Бугунги стандартларга мос моделларни ишлаб чиқариш учун зарур бўлган кўплаб деталлар бозорга чиқмаслигини ҳисобга олиб, компания автомобилни соддалаштиришни режалаштирмоқда.
Бу ҳақида “Русский автомобиль” Telegram-канали ўз манбаларига таяниб хабар берди. Таъкидланишича, импорт қилинадиган қисмларни соддалаштириш ва маҳаллий қисмларга алмаштириш Lada Vesta, Granta, Niva Travel ва Legend моделларига таъсир қилади.
Эҳтимол, моделлардан ABS ва ESP – тормозлаш пайтида ғилдиракларнинг қулфланишига тўсқинлик қилувчи тизим ва барқарорликни электрон назорат қилиш, шунингдек, хавфсизлик ёстиқчалари ва «ЭРА-ГЛОНАСС» комплекслари олиб ташланиши мумкин.
Норасмий маълумотларга кўра, автоматик бошқарув блоки соддалаштирилади, унинг дастурий таъминоти, эко-класси ҳам камаяди. “Русский автомобиль”, шунингдек, Россия Федерацияси Саноат ва савдо вазирлиги барқарор ишлаб чиқариш учун маҳаллий автомобилларнинг дизайнидаги ҳар қандай оқилона ўзгаришларни қонунийлаштириш учун кафолатлар берганлигига аниқлик киритиб ўтди.
Воқеаларнинг бундай ривожини «Автостат» таҳлилий агентлиги ижрочи директори Сергей Удалов «Коммерсант»га берган интервьюсида олдиндан башорат қилган эди. У ABS ва «хизмат кўрсатиш» опциялари автомобиллардан йўқолиши мумкинлигини айтганди. Экспертнинг фикрича, биргина кондиционер истисно бўлиши мумкин.
