Тошкент шаҳар жиноят ишлари бўйича судининг ижро ҳужжатларига асосан «Док-1 Макс» ва «Амбронол» дори воситалари истеъмолидан зарар кўрган 90 нафар жабрланувчи фойдасига жами 82 миллиард сўм компенсация тўланиши белгиланган эди.
Меъёрий муддатларда айбдорларнинг хатланган мол-мулкини сотиш жараёни ортга сурилгани сабабли, шу кунгача компенсациянинг атиги 20 фоизи (16,8 миллиард сўм) тўланган эди.
Жабрланган оилаларга етказилган моддий ва маънавий зарарни қоплашни тезлаштириш бўйича Давлат раҳбари берган топшириққа мувофиқ, давлат бюджетидан 65,2 миллиард сўм ажратилди. Натижада, ҳозирга қадар 88 нафар жабрланувчига жами 80 миллиард сўм, шу жумладан вафот этган 72 нафар боланинг оиласига 72,2 миллиард сўм ҳамда саломатлигига зарар етган 16 нафар бола оиласига 7,8 миллиард сўм тўлаб берилди. Банк карталари билан боғлиқ техник масалалар ҳал этилиши билан қолган 2 нафар боланинг оиласига 2 миллиард сўм тўлиқ ўтказилади. Ажратилган бюджет маблағлари айбдор шахсларнинг мол-мулки сотилиши ва улардан ундирувлар амалга оширилиши ҳисобидан република бюджетига қайтарилади.
