Футбол бўйича 2026 йилги Жаҳон чемпионатининг 1/16 финалида Бельгия терма жамоаси драматик тарзда Сенегал устидан ғалаба қозониб, мусобақанинг кейинги босқичига йўл олди.
АҚШнинг Сиэтл шаҳрида бўлиб ўтган баҳсда Сенегал терма жамоаси ўйиннинг 51-дақиқасига келиб икки тўп фарқи билан олдинга чиқди. Голларга Ҳабиб Диарра ва Исмаил Сарр муаллифлик қилди.
Бироқ учрашувнинг асосий вақти якунида бельгияликлар камбэк амалга оширишга муваффақ бўлди. Ромелу Лукаку ҳамда Юри Тилеманс киритган голлар ҳисобни тенглаштириб, ўйинни қўшимча вақтга олиб чиқди.
Қўшимча бўлимнинг сўнгги дақиқаларида VAR орқали вазият қайта кўриб чиқилгач, ҳакам Сенегал дарвозасига пенальти белгилади. Уни Юри Тилеманс 125-дақиқада аниқ амалга ошириб, Бельгияга 3:2 ҳисобида ғалаба келтирди.
Ушбу натижа билан Бельгия терма жамоаси Жаҳон чемпионати 1/8 финалига чиқди. Кейинги босқичда жамоа АҚШ ёки Босния ва Герцеговина терма жамоаларидан бирига қарши майдонга тушади.
