Футбол бўйича 2026 йилги жаҳон чемпионатининг G гуруҳида Бельгия ва Миср терма жамоалари ўртасидаги учрашув дуранг натижа билан якунланди. АҚШнинг Сиэтл шаҳридаги «Люмен Филд» стадионида бўлиб ўтган баҳсда жамоалар 1:1 ҳисобида муросага келди.
Учрашувда ҳисобни мисрлик футболчилар очишди. 19-дақиқада ярим ҳимоячи Эмом Ашур Муҳаммад Салоҳнинг узатмасидан сўнг жарима майдони ташқарисидан аниқ зарба бериб, жамоасини олдинга олиб чиқди.
Бельгия терма жамоаси иккинчи бўлимда ҳисобни тенглаштиришга муваффақ бўлди. Ўйиннинг 66-дақиқасида мисрлик ҳимоячи Муҳаммад Ҳани тўпни ўз дарвозасига йўллаб қўйди ва ҳисоб тенглашди.
Қолган вақт давомида ҳар икки жамоада ғалаба голини киритиш учун имкониятлар бўлган бўлса-да, ҳисоб ўзгармади.
Натижада Бельгия ва Миср жаҳон чемпионатидаги иштирокини бир очкодан бошлади. G гуруҳида иштирок этаётган Янги Зеландия ва Эрон терма жамоалари эса биринчи тур доирасида кейинроқ ўзаро майдонга тушади.
