2026 йил 13 апрель куни Фарғона водийсида ҳуқуқни муҳофаза қилувчи органлар томонидан кучли таъсир этувчи дори воситаларининг ноқонуний айланмасига оид йирик каналга чек қўйилди.
Операцияда Ўзбекистон Республикаси Давлат хавфсизлик хизмати, божхона органлари ва Ички ишлар вазирлиги ходимлари иштирок этди. Тезкор тадбирлар давомида Қўқон шаҳрига йўналган автомобил тўхтатилди.
Тергов маълумотларига кўра, 1994 ва 2002 йилларда туғилган икки нафар шахс танишига тегишли «Жентра» автомобилида Қўштепа тумани орқали Фарғона туманига келиб, қўшни давлатдан ноқонуний олиб кирилган 11 650 дона «Регапен» препаратини қабул қилиб олган.
Қайтиш вақтида транспорт воситаси Учкўприк туманида тўхтатилди. Қўлга олинишдан қочиш мақсадида гумонланувчилар таблеткаларни автомобилдан ташлаб юборишга уринган ва яширинмоқчи бўлган, аммо тезкор тарзда қўлга олинган.
Тергов маълумотларига кўра, мазкур дори воситалари Фарғона ва Қўқон ҳудудларида сотиш учун мўлжалланган бўлган. Ҳолат юзасидан жиноят иши қўзғатилган, тергов ҳаракатлари олиб борилмоқда.
Ҳуқуқни муҳофаза қилувчи органлар фуқароларни шундай қонунбузарликлар ҳақида 1520 қисқа рақами орқали хабар беришга чақириб, мурожаатлар махфийлиги кафолатланишини маълум қилди.
