2025 йил 30 сентябрь куни Тошкент шаҳри Мирзо-Улуғбек туманида содир бўлган Li 9 ва BYD автомашиналари иштирокидаги йўл-транспорт ҳодисаси яна жамоатчилик ва пойтахт судлари эътибор марказига тушди. Илк босқичда суд BYD ҳайдовчисини Li 9 ҳайдовчисига 798 млн сўм миқдорида моддий зарар тўлашга мажбур этган эди. Бироқ апелляция инстанцияси мазкур қарорни бекор қилиб, ишни қўшимча текширувга юборди.
Иш материалларига кўра, BYD ҳайдовчиси Д.Р. ўнг томондан чап томонга ҳаракат йўналишини ўзгартириб, Ф.Ж. бошқараётган Li 9 автомобили билан тўқнашган. Йўл ҳаракати қоидаларининг 53-банди — манёвр хавф туғдирмаслигига ишонч ҳосил қилиш мажбурияти — бузилгани BYD ҳайдовчисини жавобгарликка тортиш учун асос бўлган.
Автотехник экспертиза хулосасига кўра, тўқнашув вақтида Li 9 автомобилининг тезлигини аниқлаш имкони бўлмаган. Шу билан бирга, агар BYD 2–3 метр масофада ҳаракат йўналишини ўзгартирган бўлса, Li 9 юқори тезликда келаётган тақдирда тўқнашувни техник жиҳатдан олдини олиш имконсиз бўлгани қайд этилган.
Аввалроқ биринчи инстанция суди BYD ҳайдовчисини 2 млн 60 минг сўм жаримага тортиб, ундан моддий зарарни ундириш ҳақида қарор чиқарган. Li 9 ҳайдовчиси эса суғурта полиси мавжуд эмаслиги учун 206 минг сўм жаримага тортилган. Ушбу қарор ижтимоий тармоқларда кенг муҳокамаларга сабаб бўлган эди.
Тошкент судларининг 13 февраль куни маълум қилишича, апелляция инстанцияси дастлабки текширув тўлиқ ўтказилмаган, деган хулосага келиб, биринчи инстанция қарорини бекор қилган. Иш материаллари қўшимча текширув учун қайта юборилди. Суд ҳужжатидан норози томон назорат тартибида шикоят бериш ҳуқуқига эга.
Йўл-транспорт ҳодисаси Мустакиллик проспектидаги 42А-уй қаршисида содир бўлган. Оғир тан жароҳати олганлар йўқ, Li 9 ҳайдовчисига биринчи тиббий ёрдам кўрсатилган.
