Италиянинг «Рома» клуби апрель ойи якунларига кўра, ойнинг энг яхши футболчисини аниқлаш учун овоз бериш жараёнлари якунланганини эълон қилди. Бу ҳақида клуб ўзининг ижтимоий тармоқлардаги саҳифасида маълум қилган.
Сўровнома натижаларига кўра, ҳамюртимиз Элдор Шомуродов энг кўп овоз тўплаган ҳолда «Рома» клуби сафида апрель ойининг энг яхши футболчисига айланди.
Қайд этиш жоизки, ўзбекистонлик ҳужумчи клуб расмий сайтидаги овоз бериш жараёнида жамоа ҳужумчиси Матиас Суле ҳамда дарвозабон Миле Свилар каби футболчиларни ортда қолдирган ҳолда ой футболчиси номига сазовор бўлди.
Маълумот учун, Элдор Шомуродов Рим клубидаги 4 йиллик фаолияти давомида иккинчи бор ойнинг энг яхши футболчиси номини олди. Аввалроқ, февраль ойи якунларига кўра, ўзбекистонлик ҳужумчи клуб расмий сайтидаги овоз бериш жараёнида Дибала, Анхелино, Челик ва Суле каби футболчиларни ортда қолдирган ҳолда клуб сафидаги февраль ойининг энг яхши футболчисига айланганди.
Эслатиб ўтамиз, Элдор Шомуродов «Рома» клуби билан шартномасини 2027 йилнинг 30 июнига қадар узайтирган. Таъкидланишича, Шомуродов клуб билан шартномани узайтириш учун амалдаги маошининг қисқаришига розилик билдирган. «Рома» клубининг айни вақтдаги бошқарув стратегиясига кўра, жамоа шартномани узайтирмоқчи бўлган айрим футболчиларнинг маошларини қисқартиришни назарда тутади.
