ЮНИСЕФнинг Ўзбекистондаги ваколатхонаси раҳбари мамлакатдаги миссиясини якунлаяпти. Бу ҳақда “Дунё” ахборот агентлиги хабар берди.
Қайд этилишича, Ташқи ишлар вазири Бахтиёр Саидов бугун, 6 ноябрь куни дипломатик миссиясини якунлаётган БМТ Болалар жамғармасининг (ЮНИСЕФ) Ўзбекистондаги ваколатхонаси раҳбари Мунир Мамедзадени қабул қилган.
ТИВ маълумотига кўра, мулоқот чоғида Мунир Мамедзаде ва унинг жамоасига самарали фаолият ҳамда ўзбекистонликлар учун энг қулай шарт-шароитларни яратиш, айниқса, болалар салоҳиятини рўёбга чиқаришга қаратилган ислоҳотларни қўллаб-қувватлаб келаётгани учун самимий миннатдорлик билдирилган.
Маълумот учун, Мунир Мамедзаде 2020 йил сентябрь ойида Ўзбекистондаги ваколатхона раҳбари лавозимига тайинлангани ҳақидаги ЮНИСЕФ Ижрочи директори Хенриетти Форнинг хатини ТИВга тақдим этган эди. Озарбайжонлик Мунир Мамедзаде ЮНИСЕФнинг Тошкентдаги ваколатхонаси раҳбари сифатида ишлаб келган Саша Грауманн ўрнига тайинланган.
