Адлия вазирлигининг ҳайъат мажлисида 2023 йилнинг 9 ойи давомида адлия органлари ва муассасалари томонидан амалга оширилган ишлар, йўл қўйилган камчиликлар ва келгусидаги вазифалар муҳокама қилинди. Бу ҳақда «darakchi.uz»га вазирлик матбуот хизмати хабар берди.
Маълум қилинишича, ўтган даврда Адлия вазирлиги ташаббуси билан 130 та, шу жумладан 33 та қонун, 34 та Президент ҳужжатлари, 46 та Ҳукумат ҳужжатлари, 12 та идоравий норматив-ҳуқуқий ҳужжатлар лойиҳалари ишлаб чиқилган. Келиб тушган жами 93,4 мингта мурожаатларнинг 76,3 мингтаси яъни 82 фоизи қонуний ҳал этилган.
Қонун бузилиши ҳолатларини бартараф этиш бўйича давлат органлари ва ташкилотларига кўрилган таъсир чоралар натижасида уларнинг 8 227 нафар мансабдор шахслар маъмурий, 5 438 нафар шахслар интизомий жавобгарликка тортилган.
Жисмоний ва юридик шахсларнинг манфаатларида судларга киритилган 425 млрд. сўмлик даъволар (аризалар) қаноатлантирилган.
Давлат хизматларини кўрсатиш марказлари томонидан эса ўтган йилнинг шу даврига нисбатан 14%га кўп, яъни 9,6 млн. дан ортиқ давлат хизматлари кўрсатилган.
Шу билан бирга, соҳадаги айрим муаммолар мавжудлиги, жумладан, мурожаатлар билан ишлашда айрим раҳбарларнинг қатъиятсизлиги ва ҳуқуқни қўллаш соҳасидаги муаммоларни ҳал этишда тизимли ёндашувдаги айрим камчиликлар мавжудлиги таъкидланиб, уларнинг бартараф қилиш бўйича тегишли чора-тадбирлар белгиланди. Йиғилиш якунида, вазир томонидан бир қатор вазифалар белгилаб берилди.
