Франция терма жамоаси Қатарда бўлиб ўтаётган жаҳон чемпионатининг финалига чиққани учун камида 28 миллион евро олади. Оммавий ахборот воситаларининг ёзишича, ушбу “сюрприз”ни Франция футбол федерациясидагиларнинг ўзи ҳам кутмаганди.
«Мовийлар» финалда. Франция футбол федерацияси учун ФИФА дан ажойиб рождество совғаси бўлди. Мукофотлар жадвали бўйича, финалга чиққан жамоаларга камида 28 миллион евро берилади, яна турнирга тайёргарлик харажатлари учун қўшимча 1,5 миллион евро ҳам кўзда тутилган» – деб хабар бермоқда «Europe1».
Келаётган якшанба куни Европа вақти билан соат 16:00 да Дохада Франция билан Аргентина ўртасида финал учрашуви бўлиб ўтади. Ғолиб жамоага 40 миллион евро ваъда қилинган. Бу 2018 йилдаги жаҳон чемпионати ғолибига берилган мукофот пулидан анча кўп. Ўшанда ҳам Франция чемпион бўлган эди ва 32,5 миллион евро билан тақдирланганди.
Учинчи ўрин учун бўладиган ўйиннинг ғолиби ФИФА томонидан 27 миллион евро билан мукофотланади. “Кичик финал” деб таърифланаётган бу ўйинда шанба куни Марокаш ва Хорватия юзма-юз келади.
