Қирғизистон президенти имзолаган янги фармонда ёзилишича, фавқулодда ҳолат 12 октябрь соат 20:00 дан 19 октябрь соат 7:00 гача киритилади.
Қирғизистон президенти Сооронбай Жээнбеков Бишкек ҳудудида такроран фавқулодда ҳолат эълон қилди. Бу ҳақда Sputnik Қирғизистон хабар қилмоқда.
Таъкидланишича, бунга Жогорку Кенеш уч кун ичида аввал пойтахт ҳудудида фавқулодда ҳолат жорий этилиши тўғрисидаги масалани кўриб чиқмаганлиги сабаб бўлган.
Янги фармонда ёзилишича, фавқулодда ҳолат 12 октябрь соат 20:00 дан 19 октябрь соат 7:00 гача киритилади. Лекин бу фармон ҳам парламент томондан тасдиқланмаса, фавқулодда ҳолат автоматик равишда 15 октябрь куни бекор қилинади.
Президент фармонига биноан ички ишлар вазирининг ўринбосари Алмазбек Орозалиев комендант этиб тайинланган.
Эслатиб ўтамиз, 9 октябрь куни Сооронбай Жээнбеков фармони билан Қирғизистон пойтахти Бишкекда фавқулодда ҳолат эълон қилинган эди. Фавқулодда ҳолат тартиби ўша кун маҳаллий вақт билан соат 20:00 дан бошланиб, 21 октябрь 8:00 гача амал қилиши керак эди.
Манба: sputniknews-uz.
