Пойтахтда номаълум буюртмачининг топшириғига кўра одамларни ўғирлашни ташкил этганликда гумонланаётган икки эркак ушланди. Жабрланувчилардан бири мажбуран автомобилга ўтқазилганидан сўнг қочиб кетишга муваффақ бўлган. Яна бир кишини эса электрошокер ёрдамида ўғирлаш режалаштирилган.
Ички ишлар вазирлиги маълум қилишича, жабрланувчининг мурожаатидан сўнг Оператив-қидирув фаолияти департаменти ходимлари Тошкент шаҳрида яшовчи икки нафар эркакни қўлга олган. Уларнинг ҳар иккиси муқаддам ўғрилик учун жиноий жавобгарликка тортилган.
Қўлга олинганларнинг автомобили кўздан кечирилганда, багажхонасидан болта топилган ва ашёвий далил сифатида олиб қўйилган.
Телефонлар текширилганда, ҳуқуқ-тартибот идоралари ходимлари Telegram орқали эҳтимолий буюртмачи билан ёзишмаларни аниқлаган. Унда эркак гумонланувчиларга биринчи жабрланувчини ҳар қандай йўл билан етказиб келишни, кейин эса яна бир кишини ўғирлашни топширгани маълум бўлган.
ИИВ маълумотига кўра, иккинчи эркак қаршилик кўрсатган тақдирда, уни электрошокер билан ҳушидан кетказиб, кўрсатилган манзилга олиб бориш режалаштирилган. Гумонланувчилар унинг иш жойи яқинида қарийб тўрт соат кутишган. Бироқ эркак хизмат сафарига кетганини билиб, режаларини кейинга қолдиришган.
Эълон қилинган видеода қўлга олинганлардан бири ёзишмаларда электрошокер ҳақидаги гаплар ҳазил бўлганини айтган.
Ҳар икки эркакка нисбатан Ўзбекистон Республикаси Жиноят кодексининг 137-моддаси — оғирлаштирувчи ҳолатларда одам ўғирлаш бўйича жиноий иш қўзғатилган.
