Беларусь парламенти Ўзбекистон билан фуқароларни вақтинчалик меҳнат фаолиятига жалб этиш бўйича ҳукуматлараро битимни ратификация қилиш тўғрисидаги қонун лойиҳасини кўриб чиқишни бошлади. Ҳужжат Беларуснинг Миллий ҳуқуқий интернет-порталида эълон қилинган бўлиб, у ўзбекистонлик меҳнат мигрантларининг ушбу мамлакатдаги меҳнат муносабатлари, ижтимоий кафолатлари, меҳнат муҳофазаси, иш ҳақи тўланиши, солиққа тортилиши ва тиббий суғуртаси масалаларини тартибга солади.
Битимга кўра, Ўзбекистон фуқаролари иш берувчи билан келишилган ҳолда Ўзбекистон Республикасининг расмий байрам кунларида ишдан озод этилиши мумкин. Меҳнат шартномаси муддати тугаганда ёки бекор қилинганда мигрант мамлакатни тарк этиши шарт. Шунга қарамай, агар шартнома иш берувчининг айби билан тузилмай қолса, харажатларни қоплаш масаласи кўриб чиқилади. Шунингдек, Беларусь парламенти фуқароларнинг ўзаро қатнашувлари тўғрисидаги битимга ўзгартиришлар киритишни ҳам режалаштирмоқда; унга кўра, меҳнат мигрантлари Беларусь ҳудудига кирган кундан эътиборан 10 кун ичида рўйхатдан ўтишлари талаб этилади.
