Президент Шавкат Мирзиёев Бишкекда ўтказилган ШҲТ Давлат раҳбарлари кенгаши йиғилишида нутқ сўзлади. У ШҲТ сўнгги 25 йилда тенг ҳуқуқли мулоқот ва минтақавий барқарорликни таъминлашга ҳисса қўшганини таъкидлади.
Давлат раҳбари Марказий Осиё ШҲТнинг географик ва стратегик ўзаги эканини қайд этди. Шунингдек, Яқин Шарқда мулоқотни тиклаш ва кескинликни юмшатиш тарафдори эканини билдирди.
Шавкат Мирзиёев ШҲТ мамлакатларининг улкан ресурслари халқлар фаровонлигини оширишга хизмат қилиши кераклигини таъкидлади. Шу мақсадда «ШҲТ – 2040: умумий тараққиёт макони» концепциясини ишлаб чиқиш таклиф этилди.
Президент махсус иқтисодий зоналар, ишлаб чиқариш, бозорлар ва логистика тизимларини бирлаштирувчи ШҲТ Саноат кооперацияси харитасини яратиш ташаббусини илгари сурди. Шунингдек, ШҲТ Тараққиёт банкини амалий ишга тушириш зарурлиги қайд этилди.
Сунъий интеллект соҳасида ҳамкорлик бўйича Бутунжаҳон ташкилотини тузиш ташаббуси қўллаб-қувватланди. Ўзбекистон келаси йили Тошкентда ШҲТнинг сунъий интеллект ва янги рақамли ечимлар форумини ўтказишга тайёр эканини билдирди.
Иқлим ўзгариши, озиқ-овқат, сув ва энергетика хавфсизлиги масалаларига ҳам алоҳида эътибор қаратилди. ШҲТ доирасида бу йўналишлар бўйича ягона кун тартибини шакллантириш таклиф қилинди.
Шунингдек, ШҲТга аъзо давлатларнинг темир йўл маконларини интеграция қилиш бўйича кенгаш таъсис этиш ташаббуси илгари сурилди. Афғонистон билан хавфсизлик ва иқтисодий ҳамкорлик масалалари бўйича мунтазам мулоқотни қайта тиклаш зарурлиги ҳам таъкидланди.
