«Ташаббусли бюджет» лойиҳасининг 2026 йилги иккинчи мавсуми доирасида овоз бериш босқичи 21 август соат 23:59 дан бошланади.
Мазкур мавсумда фуқаролар томонидан жами 23 551 та лойиҳа илгари сурилган. Улардан 20 254 таси ишчи комиссиялар томонидан саралаш босқичидан ўтиб, овоз бериш босқичига йўналтирилган.
Шу билан бирга, Фарғона вилоятининг Фарғона шаҳрида айрим лойиҳалар ишчи комиссия томонидан асоссиз равишда рад этилгани аниқланган.
Мазкур ҳолат юзасидан Иқтисодиёт ва молия вазирлиги лойиҳаларни қайта кўриб чиқиш бўйича сўров юборган. Бироқ Фарғона шаҳри ишчи комиссияси томонидан лойиҳаларни қайта кўриб чиқиш таъминланмаган.
Шу сабабли Фарғона шаҳридаги овоз бериш жараёни лойиҳалар амалдаги мезонлар асосида қайта кўриб чиқилгунга қадар вақтинча чекланади.
Вазирлик маълум қилишича, чеклов ишчи комиссия томонидан лойиҳалар қайта кўриб чиқилгандан сўнг бекор қилиниши мумкин.
