Қорақалпоғистоннинг Амударё туманида Сайкўл кўли соҳилида янги сайёҳлик мажмуасини ташкил этиш режалаштирилмоқда. Лойиҳа ички ва хорижий туризмни ривожлантиришга қаратилган. Бу ҳақда Туризмни ривожлантириш қўмитаси матбуот хизмати хабар берди.
Мажмуа ҳудудида 5 та миллий ўтов, умумий овқатланиш ҳудуди, совғалар дўкони, пляж ва балиқ овлаш учун жойлар ташкил этилиши режалаштирилган. Шунингдек, зарур санитария инфратузилмаси яратилади.
Сайёҳлар учун отларда сайр қилиш ва очиқ ҳавода фаол дам олишнинг бошқа турлари ташкил этилади.
Лойиҳанинг алоҳида йўналиши сафари-турлар бўлади. Туроператор тасарруфида 10 та йўлтанламас автомобиль мавжуд бўлиб, уларда сайёҳлар чўл ҳудудларига саёҳат қилиб, Қорақалпоғистоннинг табиий ландшафтлари билан танишишлари мумкин.
Янги сайёҳлик объекти ҳудудга кўпроқ сайёҳларни жалб этиш ва маҳаллий аҳоли учун қўшимча иш ўринлари яратишга хизмат қилиши кутилмоқда.
