Тошкент шаҳри ҳокимлиги Хитой корпорацияси билан ҳамкорликда пойтахтдаги транспорт тирбандлигини камайтиришга қаратилган йирик инфратузилма лойиҳасини амалга оширади.
Лойиҳа доирасида умумий узунлиги қарийб 100 километр бўлган икки қаватли пуллик автомобиль йўли қурилиши режалаштирилган. Унинг тахминий қиймати 1 миллиард АҚШ долларини ташкил этади.
Шунингдек, дастур доирасида еттита ерости туннели ва янги транспорт ечимлари барпо этилади. Бундан ташқари, жамоат транспорти учун 60 километр ажратилган йўлаклар ташкил этилиб, 279 километр шаҳар йўллари реконструкция қилинади.
Лойиҳанинг амалга оширилиши натижасида Тошкентнинг транспорт инфратузилмаси сезиларли даражада яхшиланиши, магистрал йўлларнинг ўтказувчанлик қобилияти ошиши ҳамда ҳайдовчилар ва жамоат транспорти йўловчилари учун манзилга етиб бориш вақти қисқариши кутилмоқда.
