Тошкент шаҳрининг Мирзо Улуғбек туманида жойлашган Мустақиллик шоҳ кўчасида йўл инфратузилмасини яхшилаш ва транспорт ҳаракатини тартибга солишга қаратилган қурилиш-таъмирлаш ишлари бошланади. Шу муносабат билан мазкур йўлда вақтинча ҳаракат чекловлари жорий этилади.
Маълум қилинишича, 2026 йил 2 июль соат 01:00 дан 13 июль соат 06:00 гача Мустақиллик шоҳ кўчасининг Мирзо Улуғбек кўчаси кесишмасидан Оққўрғон кўчасигача бўлган қисмида транспорт воситалари ҳаракати тўлиқ чекланади.
Қурилиш ишлари давомида тирбандликларни камайтириш ва ҳайдовчилар учун ноқулайликларни минималлаштириш мақсадида йўлнинг қарама-қарши қатнов қисмида вазиятдан келиб чиққан ҳолда вақтинча икки томонлама ҳаракат ташкил этилиши мумкин.
Мутасаддилар ҳайдовчиларга ҳаракат йўналишларини олдиндан режалаштиришни тавсия қилиб, юзага келиши мумкин бўлган ноқулайликлар учун узр сўради.
Қайд этилишича, амалга оширилаётган ишлар жамоат транспорти ҳаракати учун янада қулай шароит яратиш ва йўл инфратузилмасини такомиллаштиришга хизмат қилади.
