Ўзбекистонда коррупцияга қарши курашиш тизимини янада кучайтириш мақсадида коррупцияга оид жиноятлар учун айбдор деб топилган шахсларнинг электрон реестри юритилади.
Янги тартибга кўра, коррупцияга оид жиноят содир этганликда айбдор деб топилган шахсларга нисбатан суднинг айблов ҳукми қонуний кучга кирганидан сўнг уч иш куни ичида улар ҳақидаги маълумотлар электрон реестрга киритилади. Реестрни шакллантириш ва юритиш ички ишлар органлари томонидан амалга оширилади.
Электрон реестрдаги маълумотлар Жиноят кодексида белгиланган судланганлик муддати давомида сақланади. Ушбу тизим коррупция билан боғлиқ ҳуқуқбузарликлар учун жавобгарликни кучайтириш ва давлат бошқарувида шаффофликни таъминлашга қаратилган.
Реестрга киритилган шахсларга нисбатан қатор чекловлар жорий этилади. Хусусан, улар давлат хизматига қабул қилинмайди ва давлат мукофотлари билан тақдирланмайди. Шунингдек, бундай шахсларнинг сайланадиган ёки алоҳида тартибда тайинланадиган лавозимларга номзод сифатида кўрсатилишига йўл қўйилмайди.
Бундан ташқари, коррупция учун судланган шахслар давлат органлари ҳузуридаги жамоатчилик кенгашлари ҳамда идоралараро коллегиал органлар таркибига киритилмайди. Улар ўзлари таъсис этган ва устав капиталидаги улушининг 50 фоизидан ортиғига эгалик қиладиган тадбиркорлик субъектлари орқали давлат харидлари ва давлат-хусусий шериклик лойиҳаларида иштирок этиш имкониятидан ҳам маҳрум бўлади.
Янги чекловларга мувофиқ, мазкур шахслар давлат улуши 50 фоиздан юқори бўлган ташкилотларда ҳамда давлат таълим муассасаларида раҳбарлик лавозимларини эгаллай олмайди.
Шу билан бирга, қонунчиликка киритилган ўзгаришларга мувофиқ, ўзлаштириш ёки растрата йўли билан талон-торож қилиш ҳамда фирибгарлик жиноятлари учун ҳукм қилинган ва етказилган зарарни тўлиқ қопламаган шахсларга нисбатан жазодан муддатидан илгари шартли озод қилиш тартиби қўлланилмайди.
