Футбол бўйича 2026 йилги жаҳон чемпионатининг G гуруҳида Бельгия ва Эрон терма жамоалари ўртасидаги учрашувда ғолиб аниқланмади. Инглвуд шаҳрида бўлиб ўтган баҳс 0:0 ҳисобида якунланди.
Ҳисоб очилмаган бўлса-да, майдонда устунлик асосан Бельгия томонида бўлди. Европа вакиллари рақиб дарвозаси томон 21 марта зарба берган бўлса, Эрон футболчилари бу кўрсаткич бўйича еттита зарба билан чекланди. Дарвоза соҳасига йўналтирилган аниқ зарбалар сони ҳам бельгияликлар фойдасига 7:3 бўлди. Шунингдек, тўп назорати бўйича ҳам Бельгия устунлик қилди.
Учрашувнинг ҳал қилувчи паллаларида Бельгия терма жамоаси қийин вазиятга тушиб қолди. Иккинчи бўлимнинг 66-дақиқасида ҳимоячи Натан Нгой тўғридан-тўғри қизил карточка олиб, майдонни тарк этди. Шундан кейин жамоа ўйиннинг қолган қисмини бир киши кам ҳолда ўтказишга мажбур бўлди.
Шунга қарамай, бельгияликлар ўз дарвозаси дахлсизлигини сақлаб қолишга муваффақ бўлди ва муҳим бир очкони қўлга киритди.
Иккинчи тур якунларига кўра, Бельгия ва Эрон терма жамоалари икки очкодан тўплаб, гуруҳдаги имкониятларини сақлаб қолмоқда. Шу билан бирга, Янги Зеландия ва Миср жамоалари ҳисобида бир очкодан мавжуд бўлиб, улар иккинчи тур доирасида ўзаро баҳс олиб боради.
G гуруҳида плей-офф йўлланмалари учун кураш сўнгги тургача давом этиши кутилмоқда. Ҳозирча бирор жамоа кейинги босқич масаласини ҳал қилгани йўқ ва ҳар бир очко ҳал қилувчи аҳамият касб этмоқда.
