2026 йилги футбол бўйича жаҳон чемпионатида гуруҳ босқичининг иккинчи туридан сўнг плей-офф йўлланмасини муддатидан аввал қўлга киритган дастлабки жамоалар номи маълум бўлди.
Ҳозирча учта терма жамоа кейинги босқичдаги иштирокини расман таъминлади. Улар қаторига Мексика, АҚШ ва Германия терма жамоалари кирмоқда. Ушбу жамоалар икки тур якунларига кўра ўз гуруҳларида ҳал қилувчи устунликка эришиб, плей-офф масаласини эрта ҳал қилди.
Шу билан бирга, бир қатор жамоалар учун мундиалнинг ҳал қилувчи босқичига чиқиш имконияти йўқолди. Иккинчи турдан кейин Гаити, Туркия ва Тунис терма жамоалари гуруҳдан чиқиш учун етарли натижа қайд эта олмаслиги маълум бўлди.
Жорий жаҳон чемпионати формати аввалгиларига нисбатан кўпроқ жамоаларга плей-офф учун курашиш имконини беради. Турнирда иштирок этаётган 48 жамоа 12 та гуруҳга бўлинган бўлиб, ҳар бир гуруҳда биринчи ва иккинчи ўринни эгаллаган терма жамоалар тўғридан-тўғри кейинги босқичга йўл олади.
Бундан ташқари, гуруҳларда учинчи ўринни эгаллаган жамоалар орасидан энг яхши натижа қайд этган саккизта терма жамоа ҳам плей-офф йўлланмасини қўлга киритади. Шу боис учинчи тур олдидан аксарият гуруҳларда кураш янада кескин тус олиши кутилмоқда.
Жаҳон чемпионатининг гуруҳ босқичидаги қолган учрашувлар кўплаб жамоаларнинг кейинги тақдирини ҳал қилиб беради. Айниқса, учинчи ўрин учун кураш олиб бораётган терма жамоалар учун ҳар бир очко муҳим аҳамият касб этмоқда.
