Тошкент вилоятининг Зангиота туманида қимматбаҳо металларнинг ноқонуний муомаласига қарши ўтказилган тезкор тадбир давомида 10 килограммдан ортиқ кумушни сотишга уринган шахс қўлга олинди.
Маълум қилинишича, Давлат хавфсизлик хизмати, Иқтисодий жиноятларга қарши курашиш департаменти ҳамда божхона органлари ҳамкорлигида ташкил этилган тадбирда Тошкент шаҳрида яшовчи 1992 йилда туғилган фуқаро 13 та қуйма шаклидаги жами 10 килограмм 35 грамм кумушни шартли харидорга 20,8 минг АҚШ долларига сотган вақтда ашёвий далиллар билан ушланган, ўтказилган баҳолашга кўра, ушбу кумуш маҳсулотларининг умумий қиймати 235 миллион 229 минг сўмни ташкил этади.
Терговга қадар текширув жараёнида ушланган шахс заргарлик буюмлари ишлаб чиқариш билан шуғулланувчи масъулияти чекланган жамият ходими экани аниқланган. Шунингдек, корхонада олтин ва кумуш маҳсулотларини қайта ишлаш ишлари амалга оширилган бўлса-да, қимматбаҳо металларни тозалаш ва юқори даражадаги соф металл ажратиб олиш билан боғлиқ аффинаж фаолиятини амалга ошириш учун тегишли рухсатнома мавжуд эмаслиги маълум бўлган.
Тезкор тадбирлар давомида мазкур манзилда қўшимча равишда умумий қиймати 3 миллиард 483 миллион сўмлик 58 килограмм кумуш ва 2,2 килограмм олтин сақланаётгани ҳам аниқланган.
Ҳозирда мазкур ҳолат юзасидан жиноят иши қўзғатилган бўлиб, ҳуқуқни муҳофаза қилувчи органлар томонидан тергов ҳаракатлари давом эттирилмоқда.
