Ўзбекистонда 1 июлдан қурилиш ва шаҳарсозлик соҳасида янги тартиблар жорий этилади. Президент қарорига мувофиқ, фойдаланишга топширилганига 50 йилдан ошган кўп қаватли турар жой биноларида конструкцияларни мустаҳкамлаш ишларидан ташқари ҳар қандай қайта режалаштириш ишларини амалга ошириш тақиқланади.
Ҳужжатга кўра, янги қурилиш объектларини лойиҳалаш ва барпо этишда параллел лойиҳалаш амалиётидан босқичма-босқич воз кечилади. Энди қурилиш ишларини ҳар бир босқич бўйича экспертиза хулосаси олиниб, лойиҳа давлат рўйхатидан ўтказилганидан кейингина бошлаш мумкин бўлади.
Янги тартиб тадбиркорларнинг ўз маблағлари ва тўғридан-тўғри хорижий инвестициялар ҳисобидан қуриладиган объектларга татбиқ этилади. Бундан кўп қаватли турар жой бинолари мустасно. Давлат бюджети маблағлари ҳисобидан амалга ошириладиган объектларда эса параллел лойиҳалашга фақат Президент ёки Ҳукуматнинг алоҳида қарори асосида рухсат берилади.
Шунингдек, қурилишга рухсат олиш жараёнларини рақамлаштириш, сунъий интеллект технологияларини жорий этиш ва тартиб-таомилларнинг шаффофлигини ошириш орқали муддат ва харажатларни қисқартириш режалаштирилган.
1 июлдан бошлаб муҳандислик-коммуникация тармоқларига уланиш «бир ариза — бир тўлов — барча уланиш нуқталари» тамойили асосида амалга оширилади. Бўш қувватлар ва уланиш нуқталари ҳақидаги маълумотлар ягона давлат рақамли платформасида жойлаштирилади.
1 сентябрдан эса мамлакатнинг барча ҳудудларида архитектура ва шаҳарсозлик талабларини бериш бўйича ягона давлат хизмати йўлга қўйилади. Айрим янги қурилиш объектларида видеокузатув камераларини ўрнатиш мажбурий талаб сифатида белгиланади.
Қурилиш соҳасини қўллаб-қувватлаш мақсадида 2029 йил 1 июлга қадар Ўзбекистонда ишлаб чиқарилмайдиган қурилиш техникалари, лаборатория ва инспекция ускуналарини импорт қилишда божхона божлари бекор қилинади.
