17 май куни эрта тонгдан “Янги Ўзбекистон” боғи оммавий спорт майдонига айланди. Тошкент шаҳрида баҳорнинг йирик оммавий спорт тадбирларидан бири — Silk Road Tashkent 2026 халқаро югуриш мусобақаси бўлиб ўтди.
Тадбирда профессионал спортчилар, талабалар, югуриш клублари аъзолари, болали оилалар ҳамда соғлом турмуш тарзи тарафдорлари иштирок этди. Жами 3 мингдан ортиқ киши стартга чиқди.
Қатнашчилар 5 ва 10 километр масофалардаги югуриш баҳсларида, шунингдек, Nordic Walking шимолий юриш ва Kids Run болалар югуриш мусобақаларида иштирок этдилар.
Дастурнинг алоҳида қисми сифатида “Талаба Yugur” оммавий югуриш мусобақаси ташкил этилди. Мазкур лойиҳа 2024 йилдан буён мамлакат бўйлаб ўтказиб келинмоқда ва талабалар спорт маданиятининг муҳим қисмига айланиб бормоқда.
Старт шаҳарчаси “Янги Ўзбекистон” боғида жойлаштирилди. Эрталабдан мусиқа садолари янграб, ҳамкорлар майдончалари, саҳна ва шахсий буюмларни сақлаш ҳудудлари фаолият кўрсатди. Мусобақалар олдидан иштирокчилар оммавий бадантарбия машқларини бажардилар.
Тадбирга кўплаб оилалар фарзандлари билан ташриф буюрди. Kids Run мусобақасидан сўнг болалар медаллари билан суратга тушиб, байрамона муҳитда вақт ўтказдилар.
Мусобақа Марказий Осиё югуриш ва юриш академияси ҳамда Ўзбекистон Республикаси Олий таълим, фан ва инновациялар вазирлиги томонидан ташкил этилди. Шунингдек, “Ўзбектелеком” АЖ, “ASTERIUM” АЖ, “UzAuto Motors” АЖ ва Ўзбекистон Республикаси Ташқи иқтисодий фаолият миллий банки тадбир ҳамкорлари сифатида иштирок этди.
Марказий Осиё югуриш ва юриш академияси директори Шуҳрат Усмоновнинг таъкидлашича, оммавий спорт тадбирларида нафақат профессионал спортчилар, балки талабалар, оилалар ва янги иштирокчиларнинг ҳам фаол қатнашиши югуриш маданиятини оммалаштиришга хизмат қилмоқда.
Ташкилотчилар 5 ва 10 километр масофалар бўйича эркаклар ва аёллар ўртасида ғолиб ҳамда совриндорлар учун кенгайтирилган мукофот жамғармасини тақдим этди. Жами 12 нафар спортчи совринли ўринлар учун тақдирланди.
10 километр масофада ғолибларга 6 миллион сўмгача, 5 километр йўналишида эса 3,5 миллион сўмгача пул мукофотлари топширилди. Kids Run иштирокчилари ҳам ташкилотчилар ва ҳамкорлар томонидан совғалар билан тақдирланди.
Тадбир олдидан Tashkent City Mall ҳудудида EXPO майдони иш бошлади. Бу ерда қатнашчилар старт тўпламларини қабул қилиб, мусобақа дастури билан танишиш имкониятига эга бўлдилар.
Silk Road Uzbekistan югуриш туркуми бугунга қадар Нукус, Самарқанд, Бухоро ва Тошкент шаҳарларида ўтказилди. Лойиҳанинг навбатдаги босқичи 24 май куни Қўқон шаҳрида бўлиб ўтади. Унда туркум доирасида илк бор ярим марафон ташкил этилиши режалаштирилган.
