Саудия Арабистонида футбол бўйича Осиё кубоги 2027 йил 23 декабрдан 2028 йил 21 январга қадар ўтказилади. Осиё футбол конфедерацияси (ОФК) мусобақа муддатини қарийб бир йилга кечиктиришга қарор қилди. Аввалига турнирни 2027 йил январь–февраль ойларида ўтказиш режалаштирилган эди.
ОФК маълум қилишича, қарор маҳаллий ташкилий қўмита ва Саудия Арабистони футбол федерацияси билан маслаҳатлашувлардан сўнг қабул қилинган. Бунга минтақадаги фавқулодда вазиятлар сабаб бўлган. Улар логистикада жиддий қийинчиликлар ва транспорт қатновида узилишларни келтириб чиқарган.
Турнир ташкилий қўмитаси янги саналарни маъқуллаган. Бироқ улар ҳали Халқаро футбол федерацияси (ФИФА) билан келишилиши керак.
Мусобақа муддатининг ўзгариши Ўзбекистон терма жамоасининг тайёргарлик режасига ҳам таъсир қилади. Миллий жамоа B гуруҳида иштирок этади. Унда Ўзбекистон терма жамоаси Баҳрайн, Шимолий Корея ва Иордания терма жамоаларига қарши майдонга тушади.
Шу тариқа, турнир иштирокчилари мусобақага янгиланган тақвим асосида тайёргарлик кўриши керак бўлади.
