Иккинчи жаҳон уруши йилларида нацистлар томонидан босиб олинган Жерси оролига минглаб маҳбуслар олиб келинган ва улар ҳарбий иншоотлар, туннеллар ҳамда бункерлар қурилишида мажбурий меҳнатга жалб қилинган. Уларнинг аксариятининг тақдири ҳозирга қадар номаълум бўлиб қолмоқда.
Шулардан бири — совет аскари Бокижон ҳақидаги ҳикоя 80 йилдан ортиқ вақт ўтгач яна кун тартибига чиқди. У Жерси оролидаги маҳаллий фермер оиласи томонидан яширин равишда асраб қолинган.
Бугун 89 ёшда бўлган Дульси Ле Бретон болалик хотираларида Бокижонни меҳрибон ва сокин инсон сифатида эслайди. Унинг айтишича, совет аскари у билан арқончоқ ўйнаб, инглиз тилида эртаклар ўқиб берган.
“Унинг сурати ҳали ҳам ошхонамда, ота-онамнинг фотосуратлари ёнида турибди”, — дейди у.
Маълумотларга кўра, Бокижон Жерси оролига олиб келинган икки мингга яқин совет асирларидан бири бўлган. Улар Германиянинг ҳарбий мудофаа тизимларини қуриш ишларига жалб этилган.
Тўрт йил аввал маҳаллий тарихчи Крис Эдди оролдаги оккупация даври гувоҳлари хотираларини йиғишни бошлаган ва айнан шу жараёнда Дульси Ле Бретон билан танишган. Унинг ҳикояси маҳаллий матбуотда чоп этилган бўлса-да, Бокижоннинг тўлиқ шахси ва урушдан кейинги тақдири ҳақида маълумот топилмаган.
Би-би-си рус хизмати журналисти Ольга Ившина мазкур воқеани ўрганишга киришиб, совет аскарининг кейинги ҳаётини аниқлашга ҳаракат қилган.
Тарихчилар таъкидлашича, Иккинчи жаҳон уруши даврида Европа ҳудудларида асирга тушган минглаб совет фуқароларининг тақдири ҳали ҳам тўлиқ ўрганилмаган. Бокижон ҳақидаги ҳикоя эса уруш йилларида инсонпарварлик ва жасорат намоён бўлган ноёб воқеалардан бири сифатида тилга олинмоқда.
