Андижон вилоятида аёл вояга етмаган қизни жинсий эксплуатацияга жалб қилишга уриниш билан боғлиқ иш бўйича айбдор деб топилди. Бу ҳақда Nemolchi.uz лойиҳаси раҳбари Ирина Матвиенко маълум қилди.
Манба маълумотларига кўра, 2025 йил сентябрь ойида айбланувчи оилавий можародан сўнг уйидан кетган вояга етмаган қиз билан боғда танишган. Аёл унга бола парваришчиси сифатида иш таклиф қилиб, йўл харажатлари, озиқ-овқат, яшаш жойи учун тўлов қилган ва кийим-кечак олиб берган. Шу орқали ғамхўрлик ва қонуний иш билан таъминлаш кўринишини яратган.
Таъкидланишича, кейинчалик қизни пул эвазига эркакка топшириш режалаштирилган. Аёл 23 сентябрь куни бир миллион сўм олаётган вақтида қўлга олинган. Матвиенкога кўра, вояга етмаган қиз айнан шу вақтдагина гумонланувчининг ҳақиқий ниятини билган.
Тергов жараёнида иш одам савдоси моддаси бўйича квалификация қилинган. Бироқ суд Олий суд Пленуми қарорига таяниб, айбловни қўшмачилик моддасига қайта квалификация қилди. Асос сифатида жабрланувчининг тизимли қарамлиги ва моддий бўйсуниши мавжуд эмаслиги, шунингдек ҳолат якка эпизод экани кўрсатилган.
Натижада аёлга оғирроқ модда бўйича назарда тутилган 5 йилдан 8 йилгача озодликдан маҳрум қилиш жазоси ўрнига 4 йил 6 ой озодликни чеклаш жазоси тайинланган.
Ирина Матвиенко таъкидлашича, мазкур схема груминг — заиф ҳолатдаги ўсмир билан кейинчалик жинсий эксплуатация қилиш мақсадида ишончли муносабат ўрнатиш белгиларига мос келади. Унинг сўзларига кўра, Ўзбекистон қонунчилигида груминг ҳозирча алоҳида жиноят сифатида белгиланмаган.
Аввалроқ Хоразм вилоятида ҳам шунга ўхшаш ҳолат қайд этилгани, унда вояга етмаган қиз фоҳишалик билан шуғулланиш учун сақланадиган жойда ушлаб турилгани хабар қилинган эди.
