Ўзбекистон Президенти Шавкат Мирзиёев 3–4 май кунлари Самарқанд шаҳрида бўлиб ўтадиган Осиё тараққиёт банки Бошқарувчилар кенгашининг 59-йиллик йиғилишида иштирок этади.
Давлат раҳбари форумнинг очилиш маросимида нутқ сўзлайди ва хорижий делегациялар раҳбарлари билан қатор учрашувлар ўтказади.
Тадбирнинг асосий мавзуси — «Тараққиёт чорраҳалари: минтақанинг ўзаро боғлиқ келажагини илгари суриш». Иштирокчилар «яшил» трансформация, энергетик ўтиш, рақамлаштириш, инвестицияларни жалб этиш, озиқ-овқат хавфсизлиги ва глобал таъминот занжирлари барқарорлиги масалаларини муҳокама қиладилар.
Саммитда 100 дан ортиқ давлат делегациялари, шунингдек Жаҳон банки, Халқаро валюта жамғармаси ва Осиё инфратузилмавий инвестициялар банки каби халқаро молиявий институтлар вакиллари иштирок этади. 4 мингдан ортиқ делегат қатнашиши кутилмоқда.
Ўзбекистон 1995 йилдан бери Осиё тараққиёт банки аъзоси бўлиб, унинг энг йирик ҳамкорларидан бири ҳисобланади: қўшма лойиҳалар умумий портфели қарийб 16 миллиард долларни ташкил этади. Республика мазкур банкнинг йиллик йиғилишига иккинчи марта мезбонлик қилмоқда.
