ТМХ Ўзбекистон пойтахти Тошкент шаҳрида ўтказилаётган VI халқаро саноат кўргазмаси — «ИННОПРОМ. Марказий Осиё»да ўзининг истиқболли ишланмаси — ЭП5Н ўзгарувчан токли электропоездини тақдим этди.
Ушбу поезднинг асосий ўзига хос жиҳатлари — кириш қисмида пол сатҳининг пастлиги бўлиб, бу йўловчиларнинг чиқиши ва тушишини янада қулайлаштиради; юқори йўловчи сиғими ва хизмат кўрсатиш даражасининг оширилганидир. Поезд «ТМХ-Инжиниринг» компанияси мутахассислари томонидан ишлаб чиқилмоқда.
Холдинг стендига икки давлат ҳукумат вакилларидан иборат делегация эътибор қаратди. Делегацияга Ўзбекистон Республикаси Бош вазирининг ўринбосари Жамшид Хўжаев ва Россия Федерацияси Ҳукумати раиси биринчи ўринбосари Денис Мантуров бошчилик қилди.
Холдинг бош директори, Россия машинасозлар иттифоқи бюроси аъзоси Кирилл Липа бу кунларда Тошкентда бўлиб, меҳмонларга янги поезд ва унинг темир йўл транспорти учун очиб берадиган истиқболлари ҳақида маълумот берди.
Келажакдаги ЭП5Н поезди қулай шаҳар атрофи ва ҳудудлараро ташувларни ташкил этиш учун мўлжалланмоқда. Унинг конструкциявий тезлиги 160 км/соатни ташкил этиши кутилмоқда. Электропоезд замонавий асинхрон тортиш тизими билан жиҳозланади ва таркибида 4 тадан 10 тагача вагон бўлиши мумкин.
Лойиҳада поезднинг техник ҳолатини прогноз қилишга мўлжалланган диагностика тизими, замонавий видеокузатув ва йўловчиларни ҳисоблаш тизимларини жорий этиш назарда тутилган. Поезд эшикларининг кенглиги 1250 мм, герметик вагонлараро ўтиш жойлари эса 1200 мм бўлади.
Шунингдек, лойиҳа LCD экранлар ва ахборот таблоларидан фойдаланилган кенгайтирилган ахборот тизимини ўз ичига олади. Салонларда Wi-Fi ишлайди, ҳар бир йўловчи учун USB-A ва USB-C форматдаги қувватлантириш қурилмалари кўзда тутилган. Замонавий санитар модуллар, контактсиз жиҳозлар ва болаларни парваришлаш столи, велопарковкалар ҳамда электросамокатлар учун зарядлаш ускуналари ҳам лойиҳалаштирилмоқда.
Поездни бошқариш пульти кабина марказида жойлаштирилади ва машинист уни ёрдамчисиз бошқара олади. Кабинада иситиш функциясига эга ва пневмоподвескали креслолар, иссиқлик пардалари, йиғма столча, музлатгич, микротўлқинли печ, чойнак, шунингдек, ичимликларни иситиш ва совитиш функциясига эга подстаканниклар ўрнатилиши режалаштирилган.
