2026 йил 14 апрель куни Тошкентда Ўзбекистон Республикаси Туризм қўмитаси раиси Абдулазиз Аккулов ҳамда EGI Resources компанияси бош директори Эрслан Ғазали Иброҳим ўртасида учрашув бўлиб ўтди. Мулоқотда икки давлат ўртасида туризм соҳасидаги ҳамкорликни кенгайтириш масалалари муҳокама қилинди.
Томонлар Индонезиядан Самарқанд вилояти ва Бухоро вилоятига тўғридан-тўғри авиақатновларни йўлга қўйиш истиқболларини кўриб чиқдилар. Шунингдек, Ўзбекистонда янги меҳмонхоналар қуриш ва индонез миллий таомларига ихтисослашган ресторан очиш лойиҳалари ҳам муҳокама марказида бўлди.
Учрашув давомида Индонезиядан келувчи сайёҳлар оқимини оширишга қаратилган қўшимча чора-тадбирлар ҳам таклиф этилди. Хусусан, Ўзбекистоннинг туризм салоҳиятини кенг тарғиб қилиш мақсадида индонезиялик туроператорлар учун инфотур ташкил этиш ташаббуси илгари сурилди.
Музокаралар якунларига кўра, “EGI Resources” компаниясига қарашли медиа тузилма томонидан Ўзбекистоннинг туризм имкониятларини халқаро майдонда тарғиб қилиш бўйича дастлабки келишувга эришилди. Бу ҳамкорлик икки мамлакат ўртасидаги туристик алоқаларни янги босқичга олиб чиқиши кутилмоқда.
