Ўзбекистонлик гроссмейстер Жавоҳир Синдаров Кипрнинг Пейя шаҳрида ўтказилган ФИДЕ номзодлар турнирида муддатидан олдин ғалабани қўлга киритди. У мусобақа якунланишига бир тур қолганидаёқ биринчи ўринни таъминлади.
13-турда Синдаров қора донада ўйнаб, нидерландиялик гроссмейстер Аниш Гири билан дуранг қайд этди. Ушбу натижадан сўнг улар ўртасидаги фарқ икки очко — 9,5 га 7,5 бўлиб қолди ва сўнгги тур натижалари умумий жадвалга таъсир қилмайдиган бўлди.
Шу тариқа, Синдаров нафақат турнир ғолиблигини таъминлади, балки жаҳон чемпиони унвони учун баҳслашиш ҳуқуқини ҳам қўлга киритди. У ФИДЕ номзодлар турнирида ғалаба қозонган илк ўзбекистонлик шахматчига айланди.
Энди у жаҳон шахмат тожи учун амалдаги чемпион — ҳиндистонлик гроссмейстер Гукеш Доммаражуга қарши баҳс олиб боради. Мазкур учрашув жорий йил ноябрь ойи охири — декабрь бошига режалаштирилган бўлиб, унинг ўтказилиш жойи кейинроқ эълон қилинади.
