Ҳолат бўйича “Тошшаҳартрансхизмат” АЖ Ахборот хизмати маълумот тақдим этди.
Маълум қилинишича, ҳодиса бугун, 26 февраль куни “Тошшаҳартрансхизмат” АЖнинг “7-автобус саройи” филиалига бириктирилган “Мерcедес-Бенз” русумли 33-сонли автобусда содир бўлган.
Қайд этилишича, ушбу автобус 2013 йил ишлаб чиқарилган бўлиб, ҳайдовчи А.А. бошқарувидаги автобус, Юқоричирчиқ тумани, Барданкўл—Жумабозор—Қизилтоғ йўли бўйлаб ҳаракатланаётган вақтда, тормоз тизимида носозлик келиб чиққани сабабли ёнғин юз берган.
ФВВ Ёнғин қутқарув бўлинмаси тезкор гуруҳи чақирилиб, ёнғин қисқа вақтда бартараф этилган. Мазкур ҳодиса оқибатида тан жароҳати олганлар йўқ.
Ҳозирда “Тошшаҳартрансхизмат” АЖнинг Ишлаб чиқариш техник бўлими ходимлари томонидан хизмат текшируви олиб борилмоқда.
MANBA: DARAKCHI.UZ
