Улардан бири йиғилган пулларга «Lada-Vesta» машинасини ҳам сотиб олган
Таълим сифатини назорат қилиш давлат инспекцияси прокуратура департаментига иккита нодавлат таълим муассасасининг фаолиятидан қониқмай, мурожаат қилган.
Ўтказган терговга қадар текширувда, иккита нодавлат таълим муассасалари раҳбарлари ва ходимлари фуқароларни алдаб, Телеграмда каналлар очиб, ушбу таълим масканларини битиргач бакалавр даражасини берувчи халқаро дипломга эга бўлишларини айтиб, ишонтирган.
Бунинг натижасида, биринчи таълим муассасаси 174 нафар фуқаронинг 1,1 млрд сўмини, иккинчи таълим муассасаси 171 нафар фуқаронинг 1 млрд сўмини фирибгарлик йўли билан қўлга киритганликлари аниқланган.
Шунингдек, улардан бирининг раҳбари ушбу ундирган маблағга «Lada-Vesta» машинасини харид қилган.
Мазкур ҳолатлар юзасидан Жиноят кодексининг 168-моддаси (фирибгарлик) ҳамда 243-моддаси (жиноий фаолиятдан олинган даромадларни легаллаштириш) билан жиноят ишлари қўзғатилиб, тергов ҳаракатлари ўтказилмоқда.
Фирибгар раҳбарлар бу ишлари учун 168-модда билан 30 млн сўмгача жарима тўлаши ёки 3 йилгача қамалиши мумкин. 243-модда билан эса 10 йилгача қамалиши мумкин.
Аввалроқ, абитуриентларни ўқишга киргизиш ва бошқа давлатдаги ўқишини ўзбек ОТМларига кўчириб бериш учун Самарқандда $4 минг, Жиззахда $2 минг, Андижонда $700 олган шахсларга жиноят иши очилгани ҳақида хабар бергандик.
