Барчамизга маълумки, МТРК таркибида ҳар бир вилоятнинг ўз телерадиокомпанияси мавжуд. Ҳали 90-йиллардан бошлаб вилоятлар ижтимоий-иқтисодий ҳаётидан тафсилотлар ҳақида маҳаллий ва марказий телеэкранлар орқали тематик ва ахборот дастурлари узатилиб келинади. Биргина Тошкент вилояти бу борада мақтана олмас эди. Бугун эса Тошкент вилояти қалам аҳлининг орзулари рўёбига гувоҳ бўлиш имконимиз бор, яъни 2022 йил 17 январдан Тошкент вилояти телеканали — «Nurafshon TV» Тошкент шаҳри ва Тошкент вилоятида эфирга узатилиши бошланди.
Ўзбекистон Президентининг 2021 йил 18 ноябрдаги ПҚ-18-сон қарори билан Тошкент вилоятида амалга оширилаётган ислоҳотлар ва яратилаётган имкониятлардан аҳолининг хабардорлик даражасини кенгайтириш мақсадида Тошкент вилоятида “Nurafshon TV” телеканалини ташкил этиш белгиланган эди.
Қарор асосида АКТ вазирлигининг 2021 йил 23 ноябрдаги 638-сон буйруғи билан “RRTM” ДУК томонидан техник тадбирлар амалга оширилиб, Тошкент телеминораси, Ангрен, Шоугаз, Чорвоқ ва Бекобод радиотелеузатиш станциялари орқали 17 январь кунидан бошлаб “Nurafshon TV” телеканалининг тест тариқасида эфирга узатилиши таъминланди.
