БМТ Аксилтеррор бошқармаси ва Ўзбекистон президенти ҳузуридаги Стратегик ва минтақалараро тадқиқотлар институти ўртасида меморандум имзоланди.
Меморандум асосий тамойиллар ва ҳамкорлик йўналишлари, жумладан нашрлар ва тадқиқот маълумотлари алмашинуви, БМТнинг Глобал аксилтеррор стратегияси доирасида қўшма лойиҳаларни амалга ошириш, шунингдек, томонларни қизиқтирган бошқа масалаларни ҳал этишни акс эттиради.
БМТнинг Нью-Йоркдаги штаб-квартирасида ўзаро англашув меморандумини имзолаш маросими бўлиб ўтган.
Ҳужжатни БМТ бош котиби ўринбосари, БМТ Аксилтеррор бошқармаси раҳбари Владимир Воронков ҳамда Ўзбекистон президенти ҳузуридаги Стратегик ва минтақалараро тадқиқотлар институти директори Элдор Арипов имзолади.
В.Воронков ҳужжатларни имзолаш маросимидаги нутқида БМТ тузилмалари билан ҳар томонлама ҳамкорликни ривожлантиришга қаратилаётган эътибор учун Ўзбекистон президентига миннатдорлик билдирди.
Шунингдек, у Ўзбекистон ҳукуматига БМТнинг Аксилтеррор бошқармаси фаолиятига молиявий ҳисса қўшаётгани учун миннатдорлик изҳор этди.
