Ижтимоий тармоқларда Андижон вилоятида «Cobalt» пиёдалар йўлагини кесиб ўтаётган қизчани уриб юборгани айтилган видеолар тарқалди. Вилоят ИИБ ЖХХ ЙҲХБ ахборот хизмати ҳолат юзасидан маълумот берди.
Билдирилишича, ҳодиса бугун, 8 июль куни Андижон шаҳар Ўзбекистон кўчаси «Корзинка» супермаркети олдидаги тартибга солинмаган пиёдалар ўтиш жойида юз берган. 25 ёшли А.Х. ўзининг «Cobalt» русумли транспорт воситасида ҳаракатланиб келаётган вақтида, йўлни кесиб ўтаётган 10 яшар Т.С. (қиз)ни уриб юборган.
«Ушбу ЙТҲ оқибатида пиёда Х.С. тан жароҳати олиб шаҳар шифохонасига ёткизилган», дейилади хабарда.
Қўшимча қилинишича, ҳозирда ҳолат юзасидан Андижон шаҳар ИИО ФМБ ЙҲХБ масъул ходимлари томонидан дастлабки суриштирув ишлари олиб борилмоқда.
Эслатиб ўтамиз аввалроқ Навоий вилоятининг Хатирчи туманида пиёдалар ўтиш жойидан йўлни кесиб ўтаётган 2-синф ўқувчиси автомобиль босиб кетиши оқибатида ҳалок бўлгани ҳақида хабар берилган эди.
