Сайлов кодексига киритилаётган ўзгартиришларга кўра, сиёсий партиялар томонидан депутатликка номзодлар кўрсатилаётганда аёллар сонининг энг кам миқдорини номзодлар умумий сонининг 30 фоизидан 40 фоизига ошириш назарда тутилмоқда.
Бу борадаги қонун лойиҳаси бугун Олий Мажлис Қонунчилик палатасидаги “Миллий тикланиш” демократик партияси фракцияси йиғилишида кўриб чиқилди.
— Маълумки, юртимизда аёлларнинг давлат ва жамият ҳаётидаги иштирокини кенгайтиришга, мавқеини мустаҳкамлашга қаратилган кенг кўламли ислоҳотлар амалга оширилмоқда, — деди маърузачи депутат Г.Саидғаниева. — Амалдаги Сайлов кодексида аёлларнинг сони сиёсий партиядан кўрсатилган депутатликка номзодлар умумий сонининг камида 30 фоизини ташкил этиши белгиланди. Ўша йили Қонунчилик палатаси депутатлигига бўлиб ўтган сайловларда депутатлик ўринларининг 32 фоизини аёллар эгаллади. Мамлакатимиз тарихида илк бор миллий парламентда хотин-қизлар сони БМТ тавсияларига мос даражага етди ва Ўзбекистон бу борада дунёдаги 190 та миллий парламентлар орасида 37-ўринга кўтарилди.
Халқаро ташкилот ҳисоб-китобларига кўра, у ёки бу давлатнинг депутатлик корпусида аёллар улуши 20 фоиздан ортиқ бўлган тақдирдагина болалар манфаатлари кўзланган қонунлар, шунингдек, қонун чиқарувчиларнинг 30 фоизга яқини аёл бўлсагина хотин-қизларнинг ҳаётий манфаатларини кўзлайдиган норматив-ҳуқуқий ҳужжатлар ва давлат дастурлари ишлаб чиқилиши мумкин экан.
Шу боис ишлаб чиқилган “Ўзбекистон Республикасининг Сайлов кодексига ўзгартиришлар киритиш тўғрисида”ги қонун лойиҳаси билан Сайлов кодексининг 70 ва 91-моддаларига тегишли ўзгартишлар киритилмоқда. Хусусан, унга кўра сиёсий партиялар томонидан депутатликка номзодлар кўрсатилаётганда аёллар сонининг энг кам миқдорини номзодлар умумий сонининг 30 фоизидан 40 фоизига ошириш кўзда тутилмоқда. Мазкур лойиҳани ишлаб чиқишда бу борадаги хорижий тажрибалар ҳам обдон ўрганиб чиқилди. Масалан, бу борадаги кўрсаткич Италия, Бельгия ва Францияда 50 фоиз, Испания, Португалия, Хорватия, Словения, Греция ва Молдовада 40 фоиз, Польшада 35 фоиз, Грузияда 25 фоиз этиб белгиланган, — деди депутат.
Қизғин муҳокамалар давомида фракция аъзолари қонун лойиҳасида кўзда тутилаётган норманинг аҳамиятига алоҳида тўхталдилар. Юртимиз аёлларининг жамият ва давлат ишларини бошқаришдаги ролини кучайтиришда, парламентдаги ўринлар орқали жойлардаги муаммоларни ўрганиш ва ҳал этишда аёллар иштироки кенгайишида муҳим ўрин тутиши таъкидланди. Шунингдек, қонун лойиҳаси моҳиятан партия дастурий вазифаларига ҳам ҳамоҳанг эканлиги қайд этилди.
МАНБА:ЎзА
