Тожикистоннинг Душанбе шаҳрида Иқлим ўзгариши бўйича Марказий Осиё конференцияси бўлиб ўтмоқда. Халқаро тадбирда Табиат ресурслари вазирлиги томонидан Вазир котибияти раҳбари Қадамбой Саитов бошчилигидаги делегация ҳам иштирок этмоқда.
Конференция Марказий Осиё Минтақавий экологик маркази, Тожикистон Республикаси Атроф-муҳитни муҳофаза қилиш қўмитаси, PROGREEN ҳамда «Марказий Осиё учун сув ва энергетика дастури» (CAWEP) билан ҳамкорликда ташкил этилган.
Мазкур тадбирда Ўзбекистон Республикаси Олий Мажлиси палатасининг Оролбўйи минтақасини ривожлантириш ва экология масалалари қўмитаси раиси Борий Алихонов «Марказий Осиёда иқлим ўзгариши ва тараққиёт» мавзусидаги ялпи мажлисда онлайн тарзда маъруза қилди.
Шунингдек, Табиат ресурслари вазирлиги ҳузуридаги Гидрометеорология агентлиги директор ўринбосари Ибратжон Каримов «Иқлим ўзгариши таъсирини юмшатиш ва унга мослашиш бўйича миллий сиёсат, стратегия ва дастурлар» панель сессиясида қатнашиб, Париж битими бўйича мамлакат мажбуриятларининг бажарилиши тўғрисида тақдимот ўтказди. Бундан ташқари, у «Марказий Осиёда иқлим шаффофлиги, ҳисобот бериш ва текшириш» мавзусидаги параллель сессияда маъруза қилди.
Таъкидлаш жоизки, ушбу конференция Марказий Осиё давлатлари ўртасидаги ўзаро ҳамкорликни янада мустаҳкамлашга хизмат қиладиган минтақавий кўп томонлама мулоқот майдонига айланди.
