Йўловчиларга бошқа рейсларда Истанбулга кетиш таклиф этилган.
Турк ҳаво йўлларининг Тошкент-Истанбул рейси техник сабабларга кўра аввалига бир неча соатга кечиктирилган, кейинроқ бутунлай бекор қилинган.
Бортида 265 нафар йўловчи бўлган самолёт Тошкент вақти билан 02:35 да учиши керак эди. Бироқ самолётда техник носозлик аниқлангани сабабли парвоз кечиктирилган.
Бироқ кейинроқ авиакомпания рейсни бекор қилган. Йўловчиларга эса бошқа рейсларда Истанбулга кетиш таклиф этилган.
TransferGо етакчи халқаро онлайн пул ўтказмалари хизмати Ўзбекистондаги фаолияти кенгайгани ҳақида эълон қилди. Энди Европа давлатларида ишлаётган ва яшаётган Ўзбекистон фуқаролари бир неча дақиқада хориждан Ўзбекистон банк карталарига пул ўтказишлари мумкин бўлади. Сиз сўм, АҚШ доллари ёки еврода пул ўтказишингиз мумкин.
TransferGo хорижда ишлаётган Ўзбекистон фуқаролари учун ажралмас воситага айланиши мумкин. Кам комиссиялар, пул ўтказмаларини тезкор етказиб бериш ва рус тилидаги дастур интерфейси туфайли фойдаланувчилар ўз маблағларини ўз мамлакатларига пул жўнатиш хизматлари учун ортиқча тўловларсиз имкон қадар самарали бошқаришлари мумкин.
“TransferGo даги мақсадимиз шунчаки пул ўтказиш эмас. Биз ҳар бир ўтказмада мижозларимизга харажатларни камайтириш ва вақтини тежашга ёрдам беришга интиламиз, уларга машаққатли ишлаган пулларини сақлаб қолишга ёрдам берамиз. Биз мижозларимизнинг ўсиб бораётган эҳтиёжларини қондириш учун кўп меҳнат қиламиз ва доимий равишда такомиллашамиз, шунингдек Европадаги ўзбекларга ўз хизматларимизни таклиф қилиш имкониятидан жуда хурсандмиз”, — дейди TransferGo бош директори ва ҳаммуассиси Даумантас Двилинскас.
Халқаро онлайн ўтказмаларга талаб ҳар йили ортиб бормоқда ва шу қаторда TransferGo мижозларининг базаси ва у хизмат кўрсатадиган мамлакатлар сони ортиб бормоқда. TransferGo нинг глобал мижозлар базаси яқинда 6 миллион фойдаланувчидан ошди ва Ўзбекистондан ташқари, ҳозирда тез ва тежамкор пул ўтказмалари хизматлари Қозоғистон, Қирғизистон, Тожикистон, Озарбайжон ва бошқа мамлакатларда ҳам мавжуд.
“Бу мамлакатларга кенгайиш тасодифий эмас эди. Ушбу бозорларга киришимизни кутаётган мижозларимиздан кўплаб сўровлар олдик. Энди биз уларга қулай ва ишончли тарзда Ўзбекистондаги олувчининг картасига тўғридан-тўғри пул ўтказиш имкониятини таклиф қилишдан мамнунмиз”, — деди TransferGo нинг ривожланиш бўйича менежери Анастасия Фоменко.
TransferGo — реал вақт режимида арзон, тез ва хавфсиз халқаро пул ўтказмаларини таъминловчи глобал онлайн хизматдир. TransferGo 2012 йилда Буюк Британияда ташкил этилган ва бош қароргоҳи Лондонда жойлашган. Бугунги кунда компания Вилнюс, Истанбул ва Варшавадаги офислари билан Европа, Осиё, АҚШ, Канада ва Лотин Америкасидаги 160 та давлатда тўловларни амалга оширмоқда.
TransferGo асосчиси ва бош директори Даумантас Двилинскас 2017 йилда Форбес журналининг “30 under 30” рўйхатига киритилди ва компания 2018 TechCrunch Europa мукофотларида «Йилнинг энг тез ривожланаётган стартапи» деб топилди.
Доҳадаги “Амири Девон” мажмуасида Ўзбекистон Республикаси Президенти Шавкат Мирзиёев ва Қатар Давлати Амири шайх Тамим бин Ҳамад Ол Сонийнинг икки мамлакат расмий делегациялари иштирокидаги музокаралари бўлиб ўтди.
Давлатимиз раҳбари Қатар Амирини ташриф билан келиш таклифи ҳамда Ўзбекистон делегациясига кўрсатилаётган меҳмондўстлик учун миннатдорлик билдирди.
Сиёсий мулоқотни янада мустаҳкамлаш, савдо-иқтисодий, инвестициявий ҳамкорликни кенгайтириш ва маданий-гуманитар алмашинувни фаоллаштириш масалалари кўриб чиқилди.
Қатар Амири жорий йил июнь ойида Самарқандга амалга оширган тарихий ташриф мамлакатларимиз муносабатларида янги босқични бошлагани таъкидланди. Ўзбекистон билан Қатар ўртасидаги ҳамкорликни янада юқори, стратегик шериклик даражасига олиб чиқишга қатъий интилиш билдирилди.
Турли даражаларда мулоқотлар фаоллашгани мамнуният билан қайд этилди. Ўзаро савдо ҳажми ошмоқда, икки мамлакат пойтахтлари ўртасида авиақатновлар йўлга қўйилди. Қатарнинг йирик компаниялари билан қўшма лойиҳалар бошланди.
Ташриф арафасида Доҳада Ўзбекистон элчихонаси очилди, унинг фаолияти самарали шерикликни фаол ривожлантиришга кучли суръат бағишлайди.
Қатарда муваффақиятли амалга оширилаётган ҳамда Янги Ўзбекистон тараққиёт стратегиясининг мақсад ва вазифаларига ҳамоҳанг бўлган “Нигоҳ 2030” давлат дастурига юқори баҳо берилди.
Томонлар савдо кўрсаткичларини каррасига ошириш, анъанавий ва “яшил” энергетика, нефть-кимё, металларни чуқур қайта ишлаш, қурилиш, туризм, молия ва бошқа соҳаларда қўшма инвестиция лойиҳаларини амалга оширишга тайёрлигини билдирди.
Ишбилармонлик алоқаларини фаоллаштириш учун 2024 йил январь ойида Доҳада қўшма Ҳукуматлараро комиссия, Ишбилармонлар кенгашининг биринчи йиғилишлари ва бизнес форумини ўтказиш таклиф қилинди.
Маданият, таълим ва туризм соҳаларидаги алмашинувни кенгайтиришга қаратилган саъй-ҳаракатларни ҳар томонлама қўллаб-қувватлаш лозимлиги қайд этилди.
Ўзбекистон Қатарнинг илмий ва таълим муассасалари билан ҳамкорликни чуқурлаштириш, биотехнологиялар ва сунъий интеллект, “яшил” энергетика борасида қўшма тадқиқотлар ўтказишдан манфаатдор экани таъкидланди. Доҳада Ўзбекистон маданияти ва туризм ҳафталигини ўтказишга келишиб олинди.
Глобал ва минтақавий аҳамиятга молик долзарб масалалар ҳам муҳокама қилинди.
Трансафғон темир йўлини қуриш лойиҳасини амалий илгари суриш масалаларини қўллаб-қувватлаш муҳимлиги қайд этилди.
Томонлар Афғонистонда тинчлик ва барқарорликни таъминлаш учун афғон халқига гуманитар ёрдам кўрсатишни давом эттириш муҳимлиги ҳақида якдил фикр билдирдилар.
Учрашув якунида давлат раҳбарлари бир қатор қўшма “йўл харита”ларини тайёрлаш ва эришилган келишувларни самарали рўёбга чиқариш механизмларини яратиш топшириғини бердилар.
Музокаралардан сўнг икки томонлама ҳамкорликни янада мустаҳкамлашга қаратилган ҳужжатларнинг салмоқли тўплами имзоланди.
Унинг доирасида ихтисослаштирилган тиббиёт марказлари ва ҳудудлардаги етакчи даволаш муассасаларида юқори технологик операциялар, қўшма амалиётлар, маҳорат дарслари, катталар ва болаларда кам инвазив хирургия, офтальмология, онкология ва гинекология каби қатор йўналишлар бўйича маслаҳатлашувлар бўлиб ўтади.
Соғлиқни сақлаш соҳасини рақамлаштириш, фармацевтика, халқ табобати, тиббий таълим ва илм-фан соҳаларида ўзаро ҳамкорликни янада ривожлантириш муҳокамалар марказида бўлиши кутилмоқда.
2024 йил 1 январдан бошлаб барча туман (шаҳар) давлат хизматлари марказларида алоҳида “Ижтимоий хизмат дарчалари” ташкил этилади. Бу ҳақда бугун президент томонидан қабул қилинган «Аҳолига ижтимоий хизматлар ва ёрдамлар кўрсатиш тизимини янада такомиллаштириш чора-тадбирлари тўғрисида»ги қарорида айтилган.
“Ижтимоий хизмат дарчалари” орқали ижтимоий хизматлар ва ёрдам кўрсатиш учун аризалар қабул қилиш имконияти яратилади.
Ижтимоий ҳимояни маҳалла даражасида ташкил этиш, ижтимоий хизмат ва ёрдамларни комплекс ёндашув асосида кўрсатиш, аҳоли оғир ижтимоий аҳволга тушиб қолишининг олдини олиш, шунингдек, ижтимоий ҳимоянинг манзиллилиги ва самарадорлигини ошириш ҳамда аҳолининг кўмакка муҳтож қатлами ижтимоийлашувини таъминлаш мақсадида:
1. 2023 йил 15 октябрдан бошлаб 1-иловага мувофиқ дастлаб
28 та туман (шаҳар)ларда эксперимент тариқасида Ўзбекистон Республикаси Президенти ҳузуридаги Ижтимоий ҳимоя миллий агентлигининг (кейинги ўринларда – Агентлик) “Инсон” ижтимоий хизматлар марказлари
ва ижтимоий ходимлар гуруҳлари кўрсатадиган ижтимоий хизматлар
ва ёрдамларнинг янги тизими йўлга қўйилсин.
2. Қуйидагилар туман (шаҳар)лардаги “Инсон” ижтимоий хизматлар марказларидаги ижтимоий ходимлар гуруҳлари (кейинги ўринларда – ижтимоий ходимлар)нинг асосий вазифалари ва фаолият йўналишлари этиб белгилансин:
оғир аҳволга тушиб қолган ва оғир аҳволга тушиб қолиш хавфи юқори бўлган шахслар ва оилаларга (кейинги ўринларда – ижтимоий ҳимояга муҳтож аҳоли) бевосита маҳалла даражасида комплекс ёндашув асосида профессионал ижтимоий хизматлар кўрсатиш;
ижтимоий ҳимояга муҳтож аҳолининг эҳтиёжлари ва мавжуд имкониятларини баҳолаш орқали уларга индивидуал тартибда ижтимоий хизматлар ва ёрдамлар кўрсатиш режаларини (кейинги ўринларда – индивидуал ижтимоий хизматлар режаси) ишлаб чиқиш;
индивидуал ижтимоий хизматлар режасига мувофиқ ижтимоий хизматлар ва ёрдамларнинг кўрсатилишини ташкил қилиш, шунингдек, зарур ҳолларда индивидуал ижтимоий хизматлар режасига тегишли тузатишлар киритиб бориш;
ички ресурсларни, шу жумладан ижтимоий қўллаб-қувватлаш бўйича кўнгиллиларни (қариндошлар, қўни-қўшнилар, волонтёрлар) ижтимоий хизмат ва ёрдамлар кўрсатишга жалб қилиш ҳамда уларнинг мазкур соҳадаги фаолиятини мувофиқлаштириш;
аҳолига давлат томонидан кафолатланган ижтимоий хизматлар
ва ёрдамлар тўғрисида, шунингдек, аҳолининг мазкур хизматларни олишга бўлган ҳуқуқлари бўйича тушунтириш бериш.
Бунда, давлат органлари ва ташкилотлари раҳбарлари ижтимоий хизматлар ва ёрдамлар кўрсатишда ижтимоий ходимларга ҳар томонлама кўмак бериш бўйича шахсан масъул ва жавобгар ҳисобланади.
3. Белгилансинки:
2023 йил 15 октябрдан бошлаб талабгорларни ўзгалар парваришига муҳтож бўлган ёлғиз яшовчи ёки ёлғиз кекса ва ногиронлиги бўлган шахс деб эътироф этиш ёки бекор қилиш, шунингдек, ёлғиз кексалар
ва ногиронлиги бўлган шахслар рўйхатига киритиш (ундан чиқариш) “Инсон” ижтимоий хизматлар марказларининг қарорига асосан амалга оширилади;
“Инсон” ижтимоий хизматлар марказлари директорларига муайян яшаш жойига эга бўлмаган ижтимоий ҳимояга муҳтож аҳолини Агентлик ҳузуридаги уй-жой фондига эга бўлган муассасаларга олти ой муддатгача вақтинча рўйхатдан ўтказиш ҳуқуқи берилади.
4. Республика миқёсида ижтимоий хизматлар ва ёрдамлар кўрсатиш тизимини такомиллаштиришга доирчора-тадбирлар режаси 2-иловага мувофиқ тасдиқлансин.
5. Ўзбекистон Республикаси Бош вазири А.Н. Арипов мазкур қарорга
1-иловада кўрсатилган 28 та туман (шаҳар)ларда ижтимоий хизматлар
ва ёрдамлар кўрсатилишининг янги тизимини йўлга қўйиш жараёнида юзага келадиган тизимли муаммоларни бартараф этиш чораларини кўриб борсин.
Қайд этилсинки, эксперимент даврида туман (шаҳар) ҳокимликлари “Инсон” ижтимоий хизматлар марказларида аҳолига ижтимоий хизматлар ва ёрдамларни кўрсатиш тизимини ташкил этиш бўйича
“йўл хариталари”ни тасдиқлайди.
6. Ўзбекистон Республикаси Президенти маслаҳатчиси – Агентлик директори М.П. Оллоёров икки ой муддатда эксперимент натижаси бўйича ижтимоий хизматлар ва ёрдамлар тизимини барча ҳудудларда жорий этиш бўйича таклиф киритсин.
7. Ўрнатилсинки:
Агентлик ҳамда унинг ҳудудий бўлинмалари тазйиқ ва зўравонликка учраган хотин-қизлар ва болалар билан ишлаш бўйича ваколатли орган ҳисобланади;
ижтимоий ходимлар фаолиятининг самарадорлигини баҳолаш мезонлари ўрнатилган тартибда Агентлик томонидан тасдиқланади;
ижтимоий ходимлар фаолиятининг самарадорлигини баҳолаш натижалари бўйича тўланадиган мукофотлар Ижтимоий ҳимоя давлат жамғармаси маблағлари ҳисобидан молиялаштирилади;
Ижтимоий инспекция ва унинг ҳудудий бошқармаларига Агентлик томонидан фаолияти мувофиқлаштириладиган вазирлик ва идоралар ҳамда улар тизимидаги ташкилотларга уларнинг ижтимоий хизмат
ва ёрдамларни қонунчиликда белгиланган тартибда кўрсатмаган
(ёки тўлиқ бўлмаган ҳажмда кўрсатган) ходимларига нисбатан интизомий жазо чораларини қўллаш тўғрисида тақдимномалар киритиш ваколатлари берилади.
Белгилансинки, “Инсон” ижтимоий хизматлар марказлари ҳамда ижтимоий ходимлар фаолиятини йўлга қўйиш билан боғлиқ давлат харидлари, истисно тариқасида, тўғридан-тўғри шартнома тузиш орқали амалга оширилади.
8. Адлия вазирлиги:
2023 йил 1 ноябрга қадар Агентлик билан биргаликда “Ижтимоий хизмат дарчалари”нинг асосий фаолият йўналишларини белгиловчи регламент тасдиқланишини;
2023 йил 1 декабрга қадар Агентлик буюртмасига асосан “Ижтимоий хизмат дарчалари”нинг тўлиқ фаолият олиб бориши учун зарур моддий-техник база, мебель жиҳозлари, шу жумладан алоқа воситалари (интернет, коммуникация ва бошқалар) билан;
2024 йил 1 январдан бошлаб давлат хизматлари марказлари
ва уларнинг филиалларида ижтимоий ҳимояга муҳтож аҳолига ижтимоий хизматлар ва ёрдамлар кўрсатишга ихтисослашган “Ижтимоий хизмат дарчалари” фаолияти тўлиқ ташкил этилишини таъминласин.
9. Қуйидагилар:
а) Агентлик 2023 йил 1 ноябрга қадар:
“Ягона миллий ижтимоий ҳимоя” ахборот тизимида (кейинги ўринларда – Ижтимоий ҳимоя АТ) ижтимоий хизматларни мувофиқлаштирувчи алоҳида электрон модуль (e-case) ишлаб чиқилишини ҳамда унинг фаолият кўрсатишини;
Рақамли технологиялар вазирлиги билан биргаликда “Инсон” ижтимоий хизматлар марказларидаги ижтимоий ходимлар томонидан фуқароларнинг аризаларини онлайн қабул қилиш тажрибаси мазкур қарорга 1-иловада белгиланган 28 та туман (шаҳар)ларда эксперимент тариқасида амалга оширилишини таъминласин;
б) Рақамли технологиялар вазирлиги, Агентлик Камбағалликни қисқартириш ва бандлик вазирлиги, Ёшлар сиёсати ва спорт вазирлиги билан биргаликда 2023 йил 1 декабрга қадар Ижтимоий ҳимоя АТга “Меҳр дафтари”, “Саховат ва кўмак”, “Ёшлар дафтари” ва “Аёллар дафтари” ахборот базалари, шу жумладан ушбу дафтарларга киритилган фуқаролар ҳамда уларга тайинланган тўловлар тўғрисида маълумотлар интеграциясини таъминласин.
10. Агентлик:
а) 2024 йил 1 январга қадар:
Камбағалликни қисқартириш ва бандлик вазирлиги, Ёшлар сиёсати
ва спорт вазирлиги билан биргаликда “маҳалла еттилиги” томонидан ягона саволнома асосида маҳаллада ижтимоий ҳимояга муҳтож аҳоли муаммоларини аниқлаш тизими йўлга қўйилишини;
оғир аҳволга тушиб қолган ва оғир аҳволга тушиб қолиш хавфи юқори бўлган аҳоли тоифаларини аниқлаш юзасидан таклифлар Ҳукуматга киритилишини таъминласин;
б) 2024 йил 1 мартга қадар давлат томонидан ижтимоий хизмат
ва ёрдамлар кўрсатишда ижтимоий хизматлар кўрсатиш шартномасини тузиш амалиётини жорий этиш бўйича таклифлар Ҳукуматга киритилишини таъминласин.
11. Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фондига Агентлик буюртмаси асосида тегишли нодавлат нотижорат ташкилотларига маблағлар ажратиб бориш тавсия этилсин.
12. Вазирлар Маҳкамаси бир ҳафта муддатда:
“Инсон” ижтимоий хизматлар марказлари ва маҳаллаларда ижтимоий ходимлар фаолиятини йўлга қўйиш билан боғлиқ жараёнларни қамраб олувчи тегишли Ҳукумат қарорини;
Ижтимоий ҳимоя АТ тизимига интеграция қилинадиган электрон маълумотлар базалари ва идоралараро маълумотлар алмашинуви рўйхати тасдиқланишини таъминласин.
13. Агентлик вазирлик ва идоралар билан биргаликда икки
ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига
таклифлар киритсин.
14. Ўзбекистон Республикаси Президентининг айрим қарорларига
3-иловага мувофиқ ўзгартиришлар киритилсин.
15. Мазкур қарорнинг ижросини самарали ташкил қилишга масъул
ва шахсий жавобгар этиб Ўзбекистон Республикаси Президенти маслаҳатчиси – Агентлик директори М.П. Оллоёров белгилансин.
Қарор ижросини муҳокама қилиб бориш, масъул ташкилотлар фаолиятини мувофиқлаштириш ва назорат қилиш Ўзбекистон Республикасининг Бош вазири А.Н. Арипов зиммасига юклансин.
Ўзбекистон Республикаси Президенти
Ш. Мирзиёев
Тошкент шаҳри,
2023 йил 28 сентябрь
Афғонистоннинг Ҳиндистондаги элчихонаси Нью-Деҳли томонидан қўллаб-қувватланмагани учун 1 октябрдан ўз фаолиятини тўхтатган.
Элчихонанинг ижтимоий тармоқдаги Х саҳифасида эълон қилинган баёнотда бунга сабаб «мезбон ҳукумат томонидан танқидий ёрдамнинг йўқлиги» ва «Кобулда қонуний ҳукуматнинг йўқлиги»ни кўрсатилган. Бундан ташқари, Афғонистон элчихонаси кадрлар ва ресурслар етишмаслигига дуч келди.
“Ҳиндистон ҳукумати томонидан дипломатлар учун визани узайтиришдан тортиб ҳамкорликнинг бошқа муҳим соҳаларига ўз вақтида ва етарли даражада ёрдам берилмагани жамоамиз аъзоларининг тушунарли умидсизликка олиб келди ва бизнинг кундалик вазифаларимизни самарали бажаришимизга тўсқинлик қилди”, дейилади баёнотда.
1 октябрдан бошлаб, Тошкент халқаро аэропорти ва Бобур кўчасини боғловчи кўприк йўлини таъмирлаш ишлари доирасида кўприк йўли орқали автобуслар ва юк транспортининг ҳаракати вақтинчалик чекланди. Бу ҳақда Транспорт вазирлиги матбуот хизмати хабар берди.
Шу муносабат билан, мазкур кўчалар орқали ҳаракатланувчи автобус йўналишларининг ҳаракати қуйидагича ташкил этилади:
67, 76, 94-сонли автобус йўналишларининг ҳаракати Бобур кўчасидаги Яккасой ТИИБ бекатида қисқартирилади;
11, 40, 45-сонли автобус йўналишларининг ҳаракати Бобур кўчасидан Нукус, А.Қаҳҳор, А.Қаҳҳор-7, Кичик Бешёғоч, Кичик ҳалқа йўли, Сарикўл, Темирйўлчилар, Ҳ.Алиев, Локомотив, Қумариқ кўчалари орқали кейинги ҳаракати ўз йўналиши бўйлаб вақтинчалик ўзгартирилади;
61, 106-сонли автобус йўналишлари ҳаракати Аэропорт-2 бекатида қисқартирилади;
47, 77-сонли автобус йўналишларининг ҳаракати Бобур кўчасидан Нукус, А.Қаҳҳор, А.Қаҳҳор-7, Кичик Бешёғоч, Кичик ҳалқа йўли, Сарикўл, С.Банокатий, Локомотив, Қумариқ кўчалари орқали кейинги ҳаракати ўз йўналиши бўйлаб вақтинчалик ўзгартирилади.
Давлатимиз раҳбарининг тегишли фармони билан тасдиқланган “Ўзбекистон — 2030” стратегиясидан аҳоли саломатлигини таъминлаш билан боғлиқ қатор устувор мақсадлар ўрин олган.
Шулардан бири — туберкулёз хасталигига тааллуқли. Белгиланишича, юртимизда туберкулёздан касалланиш кўрсаткичини ҳар 100 минг аҳолига нисбатан ҳозирги 34 нафардан кескин камайтириш режалаштирилган.
Республика ихтисослаштирилган фтизиатрия ва пульмонология илмий-амалий тиббиёт маркази директори Наргиза Парпиева шу йўналишдаги амалий ишлар ва улардан кутилаётган натижалар ҳақида маълумот берди:
— Бу соҳанинг ислоҳ қилиниши натижасида сўнги 10 йил ичида қарийб 170 минг нафар инсон ҳаёти сақлаб қолинди, — дейди мутахассис. — Давлат дастурларида назарда тутилган чора-тадбирларнинг самарали амалга оширилиши натижасида туберкулёз билан касалланиш кўрсаткичини 2010 йилга нисбатан 43 фоизга, ўлим кўрсаткичини эса 84 фоизга камайтиришга эришилди. Даволаш самарадорлиги эса 91,2 фоизга етказилди.
Охирги икки йилда ЖССТ тавсиялари асосида фтизиатрия бўйича барча клиник кўрсатмалар янгиланди, жами 1530 нафар мутахассис қайта тайёргарликдан ўтди. Бундан ташқари, туберкулёз касаллиги тарқалишининг олдини олиш учун ҳар йили янги туғилган чақалоқларнинг 97 фоизи эмланмоқда.
Ҳозир туберкулёзни аниқлаш бўйича туман, шаҳар, туманлараро, вилоят ва марказий лабораториялардан иборат 5 босқичли замонавий тизим ишлаб турибди.
Хасталик профилактикаси, диагностикаси ва муолажаси учун зарур барча дори воситалари давлат томонидан бепул таъминланмоқда ва бунга ажратилаётган маблағлар ҳажми йилдан йил ошириляпти. Яна бир муҳим янгилик: авваллари юртимизда туберкулёзни аниқлаш учун 3-4 ойлаб вақт талаб этиларди. Ҳозирги кунда эса бу касалликка генно-молекуляр усули орқали бор-йўғи 70 дақиқа ичида аниқ ташхис қўйилмоқда.
Айни пайтда юртимиз бўйича 97 та ПЗР лабораторияси фаолият кўрсатмоқда, улардан 40 таси бирламчи тиббий-санитария ёрдами муассасаларида жойлашган.
Илғор операция усуллари жорий этилиши, самарали дори-дармонлар қўлланилиши натижасида туберкулёзнинг турғун шакли билан касалланган беморларни даволаш муддати ҳам 2 йилдан 6-9 ойга қисқарди.
Президентимизнинг тегишли қарори асосида тасдиқланган алоҳида дастур ҳамда туберкулёз касаллиги ва пульмонология хизматларини ривожлантиришнинг мақсадли кўрсаткичларига кўра:
2023-2026 йилларда ушбу мақсадлар учун давлат бюджетидан 255 миллион доллар, халқаро донорлар ҳисобидан 17 миллион доллар маблағ ажратиш кўзда тутилган.
Ўзбекистоннинг 14 та маъмурий ҳудудида “Ўпка саломатлиги” кўчма мобил бригадалари ташкил этилиб, чекка ва олис манзилларда яшовчи аҳолини бепул тиббий кўрикдан ўтказиш йўлга қўйилмоқда.
Махсус микроавтобуслар замонавий ПЗР, мобил рентген, спирометрик, электрокардиографик ускуналар билан жиҳозланиб, улар ёрдамида мамлакатимизнинг чекка ҳудудлари аҳолисини бепул тиббий кўрикдан ўтказиш амалиёти жорий этилади.
Доҳа шаҳрида Power International компанияси бошқаруви раиси билан учрашувда шу ҳақда сўз борди.
Ўзбекистонда Power International Holding компанияси билан ҳамкорликда юқори тезликда ҳаракатланишга мўлжалланган автомобил магистрали барпо этилади.
Шавкат Мирзиёев бугун, 1 октябрь куни Доҳа шаҳрида компания бошқаруви раиси Мутаз ал-Ҳаййат билан учрашган.
Шунингдек, аммиак ва карбамид ишлаб чиқариш ҳажмини ошириш, ишбилармонлик ва меҳмонхона инфратузилмаси, соғлиқни сақлаш объектларини ташкил этиш каби лойиҳалар ҳам муҳокама қилинган.
Айни пайтда компания билан ҳамкорликда Жиззах вилоятида келгусида минтақанинг энг катта агросаноат мажмуаси бўладиган замонавий чорвачилик кластери қурилмоқда.
Компания тез орада Ўзбекистонда ўз офисини очиши режалаштирилган.
Power International — дунёнинг 19 та мамлакатида энергетика, нефть-кимё, саноат, қишлоқ хўжалиги, транспорт инфратузилмаси, соғлиқни сақлаш, туризм каби соҳаларда фаол иш олиб бораётган Қатарнинг энг йирик миллий холдингидир.
Байдарка ва каноэда эшкак эшиш бўйича бугунги кун дастуридан ўрин олган беллашувлар якунланди.
Ўзбекистон терма жамоаси аъзолари 2 та кумуш (МК1 1000 метр, МС1 1000 метр) ва 1 та бронза (WК2 500 метр) медалларига сазовор бўлишди.
Шунингдек, 500 метрга каноэда эшкак эшиш бўйича жуфтлик баҳсларида Артур Гулиев ҳамда Камрон Аҳтамов тўртинчи, Нилуфар Зокирова ҳамда Гулбаҳор Файзиева эса бешинчи бўлиб маррага келди. Худди шу масофада стартга чиққан байдаркачи йигитларимиз Денис Онуфриев ҳамда Озоджон Амриддинов эса еттинчи поғонадан жой олишди.
Эртага ҳамюртларимиз яна 6 та дастурда медаллар учун кураш олиб боришади.
Volkswagen электромобилларга талабнинг пасайиши туфайли Германиядаги заводлари фаолиятини тўхтатди.
Американинг Tesla компанияси ҳам Европа Иттифоқида электромобиллар сотувининг қисқаришига дуч келди, уларнинг Хитойдаги рақобатчилари эса, аксинча, Европа бозоридаги улушини оширмоқда. Шу билан бирга, Россияда ҳам электр транспорт воситаларига талаб ортиб бормоқда.
Ўзбекистон Республикаси Президенти Шавкат Мирзиёев “Al Mirqab Capital” холдинг компанияси ижрочи директори Саиф ур-Раҳмон Хонни қабул қилди.
1983 йилда асос солинган “Al Mirqab Capital” холдинги АҚШ, Европа ва Яқин Шарқда “For Seasons”, “The Ritz Carlton” ва бошқа брендлардаги 20 та йирик меҳмонхона эгасидир. Компания активлари қиймати 8 миллиард доллардан зиёдни ташкил этади.
Учрашувда меҳмонхона инфратузилмаси ва туризм хизматларини ривожлантириш, логистика ва энергетика тармоғини модернизация қилиш борасидаги ҳамкорлик истиқболлари муҳокама қилинди.
Хусусан, компания томонидан Тошкент вилоятида логистика маркази, Бухоро шаҳрида меҳмонхона-конгресс мажмуасини қуриш, мамлакатимизда электр ишлаб чиқариш қувватларини кенгайтиришга инвестиция киритиш режалари кўриб чиқилди.
Инвестиция лойиҳалари қўшма “йўл харитаси” асосида амалга оширилади.
Қатарга давлат ташрифининг ишбилармонлик дастури доирасида Ўзбекистон Республикаси Президенти Шавкат Мирзиёев Қатар инвестициялар агентлиги директори Бандар бин Сауд Ол Сонийни қабул қилди.
Агентлик саноат, инфратузилма, энергетика, кўчмас мулк, электрон технологиялар соҳаларида йирик лойиҳаларни амалга оширишда катта тажрибага эга глобал миқёсдаги етакчи инвестиция холдингларидан бири ҳисобланади. Идора раҳбари бир вақтнинг ўзида Қатар Марказий банки раисидир.
Учрашувда агентликнинг тўғридан-тўғри инвестицияларини мамлакатимиз ҳудудларида “яшил” энергетика объектлари – қуёш ва шамол станцияларини қуриш, транспорт инфратузилмасини модернизация қилиш, шу жумладан замонавий авиатерминаллар барпо этиш ва бошқа инвестиция лойиҳаларига жалб қилиш масалалари атрофлича кўриб чиқилди.
Илғор банк-молия хизматларини, шу жумладан ислом молияси дастурлари доирасида ривожлантиришдан манфаатдорлик билдирилди.
Қўшма лойиҳаларни амалга ошириш учун икки томонлама гуруҳ учрашувини яқин фурсатда ўтказишга келишиб олинди.
Ўзбекистон Республикаси Президенти Шавкат Мирзиёев 1 октябрь куни Доҳа шаҳрига келгач, “Nebras Power” компанияси бошқаруви раиси Муҳаммад ал-Ҳажрийни қабул қилди.
“Nebras Power” – Қатарнинг етакчи энергетика корпорацияси. Компания ўндан зиёд мамлакатида йирик лойиҳаларни амалга оширган.
Учрашувда энергетика соҳасида, энг аввало, муқобил энергетикада янги лойиҳаларни илгари суриш бўйича ўзаро манфаатли ҳамкорликни ривожлантиришнинг амалий жиҳатлари кўриб чиқилди.
Давлатимиз раҳбари Сирдарё вилоятида Қатар компанияси иштирокида буғ-газ технологиялари асосида қуввати 1,6 ГВт бўлган замонавий электр станцияси қурилиши лойиҳасини амалга ошириш бошланганини мамнуният билан қайд этди.
Сурхондарё вилоятида иссиқлик электр станциясини барпо этиш лойиҳаси доирасида тайёргарлик ишлари якунланмоқда.
Тошкент вилоятида 600 МВт қувватли энергия сақлаш тизимларини яратиш ҳамда Қорақалпоғистонда 1 ГВт қувватли шамол электр станциясини ишга тушириш бўйича қўшма режалар муҳокама қилинди.
Узоқ муддатли шериклик дастурини қабул қилиш, унга, энг аввало “яшил” энергетикага доир истиқболли лойиҳаларни киритиш юзасидан келишувга эришилди.
Вазирлар Маҳкамасининг тегишли қарорига асосан, Ғафуров Уйғун Тўлқинович Ўзбекистон халқаро ислом академияси ректори лавозимига тайинланди, дея хабар бермоқда ЎзА.
2021 йил 25 майдаги давлат раҳбарининг махсус топшириғи ва тегишли қарорига асосан, Ўзбекистон Республикаси Президентининг дин ва миллатлараро муносабатлар масалалари бўйича маслаҳатчиси Музаффар Муродович Комилов бир вақтда Ўзбекистон халқаро ислом академияси ректори вазифасини бажариб келди.
Ғафуров Уйғун Тўлқинович бундан аввал Тошкент ислом институти ректори, шу кунга қадар Ўзбекистон мусулмонлари идораси раиси ўринбосари лавозимида фаолият кўрсатган.
Қашқадарё вилоятидаги Сойбўйи қишлоғи ҳудудига тоғли ҳудуддан Ўзбекистон “Қизил китоб”ига киритилган 2 бош Тян-Шан қўнғир айиқ болалари келиб тушди. ББу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар бермоқда.
Маълум қилинишича, вазият юзасидан Экология, атроф-муҳитни муҳофаза қилиш ва иқлим ўзгариши вазирлигининг Қашқадарё вилоят бошқармаси, Шаҳрисабз туман ИИБ, Миллий гвардия, Тошкент ҳайвонот боғи ҳамда Ҳисор қўриқхонаси ходимларидан иборат тезкор ишчи гуруҳ тузилган.
Воқеа жойига етиб борган ишчи гуруҳ томонидан кўрилган оператив чора-тадбирлар натижасида айиқ болалари махсус ўқ-дорили қурол ёрдамида ухлатилган.
Айиқ болаларига ҳеч қандай шикаст етказилмасдан, “Ҳисор” давлат қўриқхонасининг «Танхоз» дарё бўлимига қўйиб юборилди, дейилади хабарда.
Президент Шавкат Мирзиёев Қатар Амири шайх Тамим бин Ҳамад Ол Сонийнинг таклифига биноан 1-2 октябрь кунлари давлат ташрифи билан ушбу мамлакатда бўлади, дея хабар бермоқда президент Матбуот хизмати.
Ташриф дастурига мувофиқ, олий даражадаги икки томонлама музокаралар ўтказилиши ҳамда «ЭКСПО Доха-2023» – «Яшил саҳро, янада яхши атроф-муҳит» халқаро кўргазмасининг очилиш маросимида иштирок этиш кўзда тутилган.
Бўлажак музокараларда етакчилар Ўзбекистон-Қатар ҳамкорлигининг ҳолати ва уни ривожлантириш истиқболларини муҳокама қиладилар, халқаро ва минтақавий аҳамиятга молик долзарб масалалар юзасидан фикр алмашадилар.
Давлат ташрифи якунида турли соҳалардаги икки томонлама муносабатларни янада мустаҳкамлашга қаратилган ҳужжатлар имзоланиши кутилмоқда.
Тошкент шаҳрида ёғингарчиликлар оқибатида ҳудудларда сув тўпланиб қолишининг олдини олиш мақсадида дренаж тизимларини режа асосида янгилаш ва таъмирлаш кўзда тутилган.
Шу ишлар доирасида, пойтахтнинг КҲАЙнинг Истироҳат кўчаси билан кесишмасидан Қўрғонча кўчасигача бўлган қисми 2023 йил 30 сентябр соат 22:00 дан 12 октябргача қисман ёпилади.
Ҳаракат йўлнинг бир томонидан ҳар икки йўналишда амалга оширилади.
Тезислар Жаҳон банки маълумотларига кўра, дунёда 1 миллардга яқин инсоннинг (сайёрамиз аҳолисининг 15 фоизи) турли шаклда ногиронлиги бор. Уларнинг катта қисми ёшлар бўлиб, ўз ҳаётида етарлича таълим олиш имконига эга бўлмаслик, саломатлик, иш топиш каби жиддий муаммоларга дуч келади. Охир-оқибат бу уларнинг камбағал аҳоли қатламига кириб қолишига сабаб бўлади.
Айнан шу масалада давлат ногиронлиги бўлган шахслар учун имкони борича тенг имкониятлар яратиш, ўзини жамиятнинг бир бўлаги деб ҳис қилиши учун уларни ҳар томонлама қўллаб-қувватлаш масъулиятини ўз зиммасига олади.
Ҳукумат сўнгги йилларда ногиронлиги бўлган шахсларни қўллаб-қувватлашда уларни ўзи учун керакли ва қизиқарли иш (касб) билан таъминлаш, таълим олишида ёрдам беришга эътиборни кучайтирилмоқда.
Президент қарори қабул қилиниб, Ёшлар ишлари агентлиги орқали ногиронлиги бўлган ёшларга ўзини ўзи банд қилиш, уларни тадбиркорликка жалб қилиш, касб-ҳунарга ўқиш учун субсидиялар ажратилмоқда. Бундай ёшларнинг хорижий тилларни ўрганиш ва нодавлат таълим ташкилотларида ўқиш харажатларини қоплаш, уларнинг асбоб-ускуна ва меҳнат қуролларини харид қилишига ёрдамлашиш ҳам яна бир ўзига хос ечим бўлди.
Субсидия механизми ишламоқда:
— Ёшларга оид давлат сиёсатини қўллаб-қувватлаш жамғармаси маблағлари ҳисобидан ҳар йили 500 нафаргача ногиронлиги бўлган ёшларга базавий ҳисоблаш миқдорининг 50 бараваригача бўлган миқдорда субсидия ажратиш бўйича Вазирлар Маҳкамасининг 2022 йил 21 июндаги 341-сон қарори қабул қилинган;
— Мазкур қарорда белгиланган тартибга кўра 2022 йилининг 1 август кунидан бошлаб субсидия олиш учун аризаларни Ягона интерактив давлат хизматлари портали орқали юбориш бўйича электрон давлат хизматлари ишга туширилди.
Маълумотларга кўра, 2023 йилнинг 10 январдан 10 сентябрь кунига қадар порталга жами 1 526 нафар ногиронлиги бўлган ёшлар томонидан аризалар юборилган.
Жумладан, аризаларнинг 511 нафари ўқиш учун харажатларини қоплаш учун, 952 нафари асбоб-ускуна ёки меҳнат қуроллари сотиб олиш учун, 63 нафари яшаш ва транспорт харажатларини қоплаб берилишини сўраб юборилган.
Жорий йилнинг 10 сентябрь кунига қадар ногиронлиги бўлган ёшларга 4 миллиард 895 миллион 370 минг 500 сўм субсидия маблағлари ажратилган.
Янгича тизим нима беради?
Биринчидан, Давлат ногиронлиги бўлган ёшларга нодавлат таълим ташкилотларида касб-ҳунар ўргатиш, уларда касбий кўникмаларни шакллантириш, ахборот технологиялари, компьютерда дастурлаш амалиёти, умумтаълим фанлари ва хорижий тилларни ўргатиш, зарур ҳолларда яшаш ва транспорт харажатларини қоплаш орқали уларнинг ижтимоий фаоллигини оширишга ёрдам беради.
Иккинчидан, ногиронлиги бўлган шахсларнинг таълим муассасаларида инклюзив таълимини ривожлантириш, уларни касбга тайёрлаш ва малакасини ошириб боришга ёрдам беради.
Учинчидан, ногиронлиги бўлган ёшларга асбоб-ускуналар ва меҳнат қуроллари олиб бериш орқали бандлигини таъминлашда, даромадли фаолият юритишларида кўмак беради.
Тўртинчидан, ногиронлиги бўлган шахсларни ижтимоий ҳимоя қилиш тизимининг самарали фаолият кўрсатишини таъминлайди.
Хулосалар Ногиронлиги бўлган ёшлар жисмоний ҳаракатланиш, коммуникация, таълим, бандлик борасида турли қийинчиликларга дуч келади. Давлат камситишларнинг олдини олиш ва етарли шарт-шароитларни яратиш чораларини кўриши табиий. Ўзбекистонда 2021 йилдан бошлаб йўлга қўйилган янгича механизм эса бундай ёшлар учун ўз қобилиятларини рўёбга чиқариш, даромадга эга бўлиш ва ниҳоят, жамиятга тўлақонли қўшилиш учун шароит яратмоқда.
Бу эса ногиронлиги бўлган шахсларга имкон берилса, улар ҳам мамлакатнинг ижтимоий-иқтисодий ривожланишига ўз ҳиссасини қўшиши мумкинлигини кўрсатади.
Энг муҳими, содда, шаффоф ва замонавий тизимнинг ишлаётганидир. Бундай қўллаб-қувватлаш чораларини кўпайтириш, ҳукумат томонидан яратилган имкониятлар, субсидиялар ҳақида ногиронлиги бўлган шахсларга кўпроқ маълумот етказиш ушбу чораларнинг кўлами ва аҳамиятини янада ошириши шубҳасиз.
Владелец сайта - ООО "Media Biznes". Свидетельство № 1038 выдано Узбекским агентством по печати и информации