Ўзбекистон самбо ассоциацияси Матбуот хизмати хабарига кўра, самбо бўйича Жаҳон чемпионати жорий йил 12-14 ноябр кунлари Ўзбекистонда ўтказилади. Бу ҳақда Москва шаҳрида ўтказилган Халқаро самбо федерацияси Ижроқўм йиғилишида қарор қабул қилинди.
Aввалроқ, ушбу Жаҳон чемпионати мезбони сифатида Москва танланганди. Бироқ, Спорт арбитраж суди (CAС) қарори билан Россия икки йил давомида Жаҳон чемпионатлари ва Олимпия ўйинларини ўтказиш учун даъвогарлик қила олмайди. Шу сабабли, Халқаро самбо федерацияси ва Россия самбо федерацияси ушбу мусобақани бошқа мамлакатда ўтказиш қарорига келишди.
“Биз жаҳон чемпионатини ўтказиш учун Ўзбекистон самбо ассоциациясидан таклиф олдик. Тошкентда 2025 йилги ёшлар Осиё ўйинлари бўлиб ўтишини ёдда тутган ҳолда, ушбу мусобақани Ўзбекистонда ташкил қилишни мақсадга мувофиқ деб ҳисоблайман”, — деди Халқаро самбо федерацияси президенти Василий Шестаков.
Ундан аввал Тошкент июн ойида самбо бўйича Осиё чемпионатига ҳам мезбонлик қилади.
