Ўзбекистонга Туркий дунёнинг туристик пойтахти рамзий калити топширилди. Тантанали маросим 7 ноябрь куни Истанбулда Туркий дунё VI халқаро «Қўрқут ота» кинофестивалининг ёпилиш маросими доирасида бўлиб ўтди.
Тадбир давомида Туркия маданият ва туризм вазири Меҳмет Нури Эрсой 2026 йилда Туркий дунёнинг туристик пойтахти мақомини олган Анқаранинг рамзий калитини Ўзбекистон Туризм қўмитаси раиси Абдулазиз Аккуловга топширди.
Тошкентга ушбу мақом берилиши муносабати билан Ўзбекистонни табриклаган Меҳмет Нури Эрсой мамлакатнинг бой тарихий-маданий мероси, ўзига хос миллий анъаналари ва улкан туристик салоҳиятини алоҳида таъкидлади. Унинг сўзларига кўра, янги мақом туркий давлатлар ўртасидаги туристик алоқаларни мустаҳкамлашга хизмат қилади.
Абдулазиз Аккулов эса барча туркий давлатлар вакилларини 2027 йилда Тошкентга ташриф буюришга таклиф қилди. Шунингдек, у кино санъати намояндаларини ижодий лойиҳалари орқали Ўзбекистонни халқаро аудиторияга кенгроқ танитишга, мамлакатнинг қадимий шаҳарлари, тарихий обидалари, гўзал табиати ва маданий мероси ҳақида ҳикоя қилишга чақирди.
Тошкентга 2027 йил учун Туркий дунёнинг туристик пойтахти мақомининг берилиши Ўзбекистоннинг халқаро майдондаги туристик салоҳиятини тарғиб қилиш ва туркий давлатлар ўртасида маданий ҳамкорликни ривожлантиришга қўшимча туртки беради.
