Green Card DV-2027 лотереясига аризаларни қабул қилиш қачон бошланиши ҳозирча номаълум. АҚШ Апелляция суди Давлат департаментини 2026 йил 1 ноябрга қадар аризаларни қабул қилишга мажбурлаган қарор ижросини тўхтатди. Янги сана ҳозирча эълон қилинмаган.
Ноаниқлик суд жараёни билан боғлиқ. Red Eagle Law юридик фирмаси лотерея иштирокчиларини рўйхатга олишни муддатидан олдин бошлашни талаб қилган.
Биринчи инстанция суди даъвогарлар талабини қўллаб-қувватлаб, АҚШ ҳукуматини аризаларни қабул қилиш бошланадиган санани белгилашга мажбурлаган. Бироқ Давлат департаменти ушбу қарор устидан апелляция шикояти берган.
Апелляция суди ҳукумат шикоятини қаноатлантириб, аввалги қарор ижросини тўхтатди. Натижада аризаларни 1 ноябрга қадар қабул қилиш талаби ўз кучини йўқотди.
Шу билан бирга, DV-2027 дастури бекор қилинмаган. Рўйхатдан ўтиш муддатлари суд жараёнининг кейинги боришига боғлиқ бўлади.
Бўлажак иштирокчиларга АҚШ Давлат департаментининг расмий сайти — travel.state.gov орқали эълонларни кузатиб бориш тавсия этилмоқда. Шунингдек, расмий муддатлар эълон қилинмасидан олдин рўйхатдан ўтказишни ваъда қилаётган воситачиларга ишонмаслик сўралмоқда.
