Дунёдаги энг йирик криптобиржа Binance йирик хакерлик ҳужумига учради. Компаниянинг дастлабки баҳолашига кўра, зарар миқдори қарийб 6,3 млрд долларни ташкил этган. Активларнинг тахминан 3 млрд долларлик қисмини музлатишга эришилган.
Binance тахминига кўра, ҳужумчилар тизимга DevOps муҳандисларидан бирининг ноутбуки орқали кирган бўлиши мумкин. Улар ушбу қурилма ёрдамида маблағларни рухсатсиз чиқариш операцияларини амалга оширган.
Ҳужум аниқланганидан сўнг биржа ҳисобларни тўлдириш ва маблағларни ечиб олиш операцияларини вақтинча тўхтатди. Компания текширувга ҳуқуқни муҳофаза қилувчи органлар ва блокчейн таҳлили бўйича мутахассисларни ҳам жалб қилди.
Ҳодиса криптовалюта бозорига ҳам таъсир кўрсатди. Хабарлар ортидан биткоин нархи тахминан 3 фоизга, Ethereum эса 3 фоиздан кўпроққа пасайди.
Binance барча зарарни ўз маблағлари ва SAFU захира жамғармаси ҳисобидан қоплашини маълум қилди. Компания фойдаланувчилар маблағлари хавфсизлигини ҳам таъкидлади.
Текширув давом этмоқда. У якунланганидан сўнг Binance ҳодиса бўйича батафсил техник ҳисобот эълон қилишни ваъда қилган.
