Аввалроқ Ўзбекистонда айрим эҳтиёжманд оилаларга 1 млн сўм миқдорида бир марталик моддий ёрдам ажратилиши режалаштирилгани хабар қилинган. Энди ушбу чора 2026 йил 28 октябрдаги президент фармони (ПФ-236) билан расман тасдиқланди. Тўловлар 2026/2027 йилги иситиш мавсуми доирасида ноябрь ойида амалга оширилади.
Маблағлар 2026 йил ноябрь ойида ажратилади. Ёрдам Ижтимоий реестрга киритилган оилалар, шунингдек, эҳтиёжмандлик мезонларига мос келадиган бошқа хонадонларга берилади.
Жумладан, оиланинг ҳар бир аъзосига тўғри келадиган даромад минимал истеъмол харажатларининг (МИХ) икки бараваридан ошмаслиги керак.
Марказлашган иситиш тизимига уланган кўп квартирали уйлар аҳолиси учун алоҳида шартлар белгиланган. Қорақалпоғистон Республикаси ва вилоятларда бир киши ҳисобига тўғри келадиган даромад МИХнинг икки бараваридан, Тошкент шаҳрида эса уч бараваридан ошмаслиги лозим.
Парваришга муҳтож ёлғиз кексалар ва ногиронлиги бўлган шахсларга ҳам ёрдам ажратилади. Шунингдек, таркибида етим ёки ота-она қарамоғидан маҳрум бўлган болалар яшайдиган оилалар ҳам ушбу тўловни олади.
