Тошкент вилоятидан пойтахтга қатнайдиган учта янги автобус йўналишини ишга тушириш режалаштирилмоқда. Тошкент шаҳар транспорт бошқармаси маълум қилишича, янги автобуслар транспорт кутиш вақтини қисқартириш ва амалдаги йўналишлардаги юкламани камайтиришга ёрдам беради.
Гап 162, 163 ва 167-сонли йўналишлар ҳақида бормоқда. Улар Тошкент вилоятидаги маҳаллалар ва аҳоли пунктларини пойтахт билан боғлайди. Жумладан, 163-сонли йўналиш Тўқмачи, Назарбек, Тарнов, Шифобахш сувлар ва Беруний кўчалари орқали ўтади.
Янги йўналишларни ишга тушириш учун «Keles Renesans» МЧЖ Хитойнинг ZHONGTONG компаниясидан 54 та автобус сотиб олиш бўйича шартнома тузган. Дастлабки тўловлар амалга оширилган. Автобуслар 2026 йил ноябрь ойи охирига қадар етказиб берилиши кутилмоқда.
Ҳозирда Зангиота тумани ва Тошкент шаҳри ўртасида брутто-шартномалар асосида 15 та автобус йўналиши фаолият юритмоқда. Жумладан, 134-сонли йўналишда ўртача 13 дақиқалик интервал билан 11 та автобус қатнайди. 135-сонли йўналишда эса тўққизта автобус хизмат кўрсатиб, уларнинг ҳаракатланиш оралиғи 14 дақиқани ташкил этади.
Бундан ташқари, аҳолига 1253 ва 1254-сонли йўналишлардаги йўналишли таксилар ҳам хизмат кўрсатмоқда. Янги автобус йўналишларининг жорий этилиши пойтахтга қатнов имкониятларини кенгайтириш ва транспорт кутиш вақтини қисқартиришга қаратилган.
