Ўзбекистонда хорижда яшаётган ватандошлар ва уларнинг оила аъзоларини мамлакатга таклиф қилиш, шунингдек, фуқаролиги бўлмаган шахсларга биометрик сафар ҳужжатларини расмийлаштириш тартиби белгиланди. Бу ҳақда Norma хабар берди.
Янги тартиб Вазирлар Маҳкамасининг 2026 йил 20 октябрдаги 579-сон қарори билан тасдиқланган. Ҳужжат 21 октябрдан кучга кирган.
Аризаларни Ягона интерактив давлат хизматлари портали ёки давлат хизматлари марказлари орқали топшириш мумкин. Ҳужжатлар икки иш куни ичида кўриб чиқилади. Шундан сўнг ваколатли орган етти иш куни ичида электрон хулоса тайёрлайди.
QR-кодга эга электрон таклифнома ариза берувчига юборилади. У берилган кундан бошлаб уч ой давомида амал қилади.
Алоҳида регламент Ўзбекистонда истиқомат қилувчи фуқаролиги бўлмаган шахсларга биометрик сафар ҳужжатларини расмийлаштириш тартибини белгилайди.
Ариза кўриб чиқилгач, ваколатли орган ариза берувчини биографик маълумотлар, рақамли фотосурат ва бармоқ изларини тақдим этиш зарурлиги ҳақида хабардор қилади. Бармоқ изларини топшириш талаби 16 ёшдан катта шахсларга нисбатан қўлланилади.
Хабарнома олинганидан кейин бир ой ичида ариза берувчи зарур ҳужжатларни давлат хизматлари маркази ёки Ягона интерактив давлат хизматлари портали орқали топшириши лозим.
