Хитой BRICS давлатлари учун сунъий интеллект соҳасида халқаро ҳамкорлик марказини ташкил этади. Бу ҳақда Хитой Халқ Республикаси Раиси Си Цзиньпин Нью-Деҳлида бўлиб ўтган BRICSнинг XVIII саммитида маълум қилди.
Хитой раҳбарига кўра, янги марказ, аввало, Глобал Жануб мамлакатлари ўртасида сунъий интеллект технологияларини биргаликда ишлаб чиқиш ва тажриба алмашиш учун майдон вазифасини бажаради. Си Цзиньпин BRICS давлатларини марказ фаолиятида иштирок этишга чақирди.
Хитой, шунингдек, очиқ кодли технологияларни янада фаол ривожлантириш ҳамда сунъий интеллект соҳасидаги тадқиқот ва ишланмалар натижаларидан биргаликда фойдаланиш тарафдори.
Пекин сунъий интеллектни саноатда қўллашга ҳам алоҳида эътибор қаратишни таклиф қилмоқда. Хитой ҳамкор давлатлар билан сунъий интеллект соҳасида тадқиқотлар ва технологияларни жорий этиш, шунингдек, ишлаб чиқариш ҳамда таъминот занжирларида ҳамкорликни ривожлантиришга тайёр.
BRICSнинг XVIII саммити 12–13 сентябрь кунлари Нью-Деҳлида Ҳиндистон раислигида ўтказилмоқда. Учрашувда технологиялар, савдо ва инвестициялар, энергетика ва озиқ-овқат хавфсизлиги, соғлиқни сақлаш, шунингдек, глобал институтларни ислоҳ қилиш масалалари муҳокама қилинмоқда.
Сунъий интеллект аллақачон BRICS давлатлари ҳамкорлигининг асосий йўналишларидан бирига айланган. 2024 йилда Россия Президенти Владимир Путин бирлашма доирасида сунъий интеллект соҳасида альянс тузишни таклиф қилган. 2025 йилда ҳам сунъий интеллектни ривожлантириш ва тартибга солиш BRICSнинг устувор йўналишлари қаторига киритилган.
