Ўзбекистон Соғлиқни сақлаш вазирлиги делегацияси онкология, радиология ва ядровий тиббиёт соҳасидаги илғор тажрибани ўрганиш мақсадида Санкт-Петербург шаҳридаги етакчи тиббиёт муассасаларига ташриф буюрди.
Ташриф доирасида Ўзбекистон вакиллари Н.Н. Петров номидаги Миллий тиббий тадқиқот онкология маркази ҳамда Березин Сергей номидаги Тиббиёт институти (МИБС) фаолияти билан танишди.
Учрашувлар чоғида томонлар Ўзбекистон ва Россия тиббиёт муассасалари ўртасидаги ҳамкорликни кенгайтириш, тажриба алмашиш ва онкологик касалликларни ташхислаш ҳамда даволашнинг замонавий технологияларини жорий этиш масалаларини муҳокама қилди.
Ўзбекистонлик мутахассислар учун стажировка ва малака ошириш дастурларини ташкил этишга алоҳида эътибор қаратилди. Жумладан, онколог шифокорлар, радиотерапевтлар, патоморфологлар ва ядровий тиббиёт соҳаси мутахассисларини тайёрлаш масалалари кўриб чиқилди.
Шунингдек, профессионал ҳамкорликни янада ривожлантириш, қўшма таълим дастурларини амалга ошириш ва Ўзбекистон онкологик ёрдам тизимига замонавий ёндашувларни жорий этиш имкониятлари муҳокама қилинди.
Кутилишича, мазкур ҳамкорлик тиббиёт кадрлари тайёргарлиги сифатини ошириш, шунингдек мамлакатда онкологик касалликларни эрта аниқлаш ва даволаш имкониятларини кенгайтиришга хизмат қилади.
