1 июндан бошлаб Ўзбекистонда электр энергияси ва табиий газ учун янгиланган тарифлар амал қила бошлайди. Тегишли қарор Вазирлар Маҳкамаси томонидан 2025 йилда жорий этилган энергия ресурслари нархларини ҳар йили индексация қилиш механизми доирасида тасдиқланди.
Ҳужжатга кўра, I, II ва IV гуруҳ истеъмолчилари учун электр энергиясининг бир киловатт-соати 1 100 сўм этиб белгиланади. Аҳоли ва бошқа маиший истеъмолчилар учун эса истеъмол ҳажмига қараб табақалаштирилган тўлов тизими сақлаб қолинади.
Электр плитаси билан жиҳозланган кўп қаватли уйлар ва ётоқхоналар аҳолиси учун тарифлар қуйидагича бўлади:
— ойига 200 кВт·соатгача — 1 кВт·соат учун 325 сўм;
— 201 кВт·соатдан 500 кВт·соатгача — 450 сўм;
— 501 кВт·соатдан 1 000 кВт·соатгача — 550 сўм.
Қолган маиший истеъмолчилар учун эса қуйидаги тарифлар белгиланган:
— 200 кВт·соатгача — 650 сўм;
— 201 кВт·соатдан 500 кВт·соатгача — 900 сўм;
— 501 кВт·соатдан 1 000 кВт·соатгача — 1 100 сўм.
Шу билан бирга, белгиланган лимитдан ортиқ истеъмол учун оширилган коэффициентлар сақлаб қолинади.
Ўзгаришлар табиий газ нархларига ҳам тааллуқли бўлади. Истеъмолчиларнинг аксарият тоифалари учун бир кубометр газ нархи 2 000 сўм этиб белгиланди. Автомобилларга газ тўлдириш компрессор станциялари учун тариф 1 кубометр учун 2 750 сўмни ташкил этади.
Аҳоли учун газ тўловининг табақалаштирилган тартиби ҳам сақланиб қолади. Иситиш мавсумида ойига 500 кубометргача, қолган вақтда эса 100 кубометргача истеъмол қилинганда, бир кубометр газ нархи 1 100 сўм бўлади.
Қарорда тарифларни қайта кўриб чиқишдан ташқари, энергия ресурслари йўқотилишини қисқартириш, энергия самарадорлигини ошириш ва хизматлар сифатини яхшилаш чоралари ҳам назарда тутилган.
