29–30 апрель кунлари Чехия Республикаси Бош вазири Андрей Бабиш Ўзбекистонга расмий ташриф билан келади. Ташриф дастури доирасида Тошкент шаҳрида олий даражадаги музокаралар ўтказилиши режалаштирилган бўлиб, улар ўзбек-чех кўп қиррали ҳамкорлигини янада ривожлантириш истиқболларига бағишланади.
Кутилмоқдаки, томонлар ўзаро савдони кенгайтириш, машинасозлик, “яшил” энергетика, кимё саноати, фармацевтика ва транспорт соҳаларида ҳамкорликни чуқурлаштириш масалаларини муҳокама қиладилар. Шунингдек, маданий-гуманитар ва таълим соҳаларидаги ҳамкорлик ҳам кун тартибидан ўрин олган.
Музокаралар давомида халқаро кун тартибидаги долзарб масалалар, жумладан кўп томонлама майдонларда ўзаро қўллаб-қувватлаш бўйича фикр алмашиш режалаштирилган.
Учрашув якунида икки томонлама ҳужжатлар пакети имзоланиши кўзда тутилган. Шунингдек, ташриф доирасида Андрей Бабиш ўзбек-чех бизнес-форумида ҳам иштирок этади.
